Trump-a’n Gaza indo a tawp ta tih puang

Trump-a’n Gaza indo a tawp ta tih puang
Inremna awm angin Thawhtanni khan Hamas-in Gaza-a Israeli an hren la damte an chhuah kim ta a, Israel pawhin Palestinian lung in tangte an chhuah ve bawk a. US President Donald Trump-a chuan kum hnih indona chu a tawp ta tih a puang.
Mi hren leh tangte chhuah a nih hnuah Trump-a chuan Gaza Strip awm zel dan tur sawipuiin Egypt-ah Muslim leh European hruaitute a intawhkhawmpui a. Hetah hian inremna atana rawt hmabak la pawm lo pahnih, Hamas leh Israel an tel lo thung.
Israeli sipaite chuan mi hren 20-te chu Gaza atangin Red Cross-in an phur chhuak tih an puan rualin mipui hlim thawm a ring hle a. Tel Aviv-a Hostage Square-a mi sang tel pungkhawm chu an inkuah a, thenkhat mittui a tla.
Gaza-ah pawh Palestinian lung in tang chhuah 2,000-te an phurh luhna, damdawi in tualah an chhungte an pungkhawm ve bawk.
“Van a thiang a, silai ri a reh a, siren a la ri reng a, Ram Thianghlimah ni a lo chhuak a, muanna a lo thleng ta,” tiin Trump-a chuan Israeli parliament, Knesset-ah a sawi zui a. Israeli leh Palestinian tana ‘zan lungchhiatthlak’ chu rei tak hnuah a tawp ta tih a sawi.
US bakah Egypt, Qatar leh Turkey ten palai hna thawkin Israel leh Hamas inkahhai thawh khatna hi pawm a ni a, Hamas-in an mi hren chhuahin Israel-in lung in tang an chhuah bawk.
Thawhtanni zan khan Egypt-a Sharm el-Sheikh-ah Trump leh President Abdel Fattah al-Sisi chuan ram 20 chuang hruaitute mikhualin inremna sawh ngheh dan tur an sawiho zui.
Intawhkhawm hawnnaah hian Trump-a hian Egypt, Qatar leh Turkey hruaitute nen lehkhaa hming ziakin Gaza-a muanna a awm theih nan leh ‘hun kal zelah pawh a huhova an thawh zelna tur’ an ziak.
Egyptian president chuan sawihonaah hian sorkar, venhimna leh Gaza tun din lehna tur a tel tih a sawi.
“Tunah hian tun dinna chu tan a ni,” tiin Trump-a chuan a sawi a. A thu sawi zuinaah Gaza inremna siam chu ‘inremna lian ber’ a nih thu a sawi.
Intawhkhawmah hian Israel leh Hamas aiawh an tel lo va, Saudi Arabia leh United Arab Emirates aiawh an tel lo bawk.
Trump-a hi Palestinian Authority President Mahmoud Abbas nen pawh an inchibai a, an inbe rei viau bawk a. Palestinian Authority hian Gaza-a inawpna kal zel dan tura tel ve a inhuam tih a lo sawi tawh a, Israel-in a duh lo thung.
Israeli mi hren chhuahte hi October 7, 2023-a Hamas-in an ram an beiha mi 1,200 vel an thah tuma mi 251 an hruaite zinga mi an ni a, he beihna hi indona tichhuaktu a ni bawk.
Kar hmasa khan inkahhai hi pawm niin Israeli sipaite chu indonaa an beihpui thlak lian ber pakhat leh Gaza City an sawp chhiat vekna atangin an inhnukdawk.
Hemi hnuah hian Palestinian tam tak chu Gaza Strip-a an chenna in chhe tawh tak, Israeli-in nasa taka a tihchhiatsakah an kir leh tawh a, indona avang hian 68,000 chuang an thi hman a ni.
Inkahhai hi kalpui mek mah se inremna tak tak awm turin hmabak a la tam hle a. Heng zingah hian mi hren thi tawh 26 leh an chin hriat loh mi pahnihte lak kir pawh a tel.
Hamas chuan an ruang hi hmuh mai a harsa dawn a, phumna hmun pawh hriat a ni vek lo tih an sawi a. Israeli sipaite chuan kuang pali an hawn a, anmahni pawh finfiah a ni tih an sawi.
Hmabak ko ber chu engtin nge Gaza a awm zel dawn tih a ni a, Hamas hma lam pawh a chiang lo va, Israel-in ralthuam tung tura an duh laiin anmahni chuan an duh lo thung.
Israeli-te awp West Bank-ah pawh boruak a sang hle a, a luahtu Judate hian Palestinian-ten nakina an ram la ni turah huang an zauh thui tawh hle a ni.
Gaza indona hian Middle East a nghawng zau hle a, Israel leh Iran chu ni 12 an indo phah a. Iran thawhpui Lebanon-a Hezbollah leh Yemen-a Houthi-te nen an inbeih reng phah bawk.