Trump-a’n inbiaa a sawmna Iran-in hnawl

On Oct 22, 2025 3 0

Trump-a’n inbiaa a sawmna Iran-in hnawl
Iranian Supreme Leader Ayatollah Ali Khamenei chuan US President Donald Trump-a’n inbiaka a sawmna chu a hnawl a, US-in Iran-a nuclear sawngbawlna a neihte a tichhe vek nia a sawi pawh a dik loh thu a sawi.
Tehran leh Washington hi nuclear chungchangah thawh nga an inbe hman a; mahse, June thlaa ni 12 chhung Israel nen an indo hnu leh US-in Iran-a nuclear hmunhma a kahsak hnuah an indawr zui tawh lo.
“Trump-a hian inremna siamtu a nih thu a sawi a; mahse, inremna a sawi hi tihluihna a ni a, a hlet a chhuah lah sawi lawk theih loh a ni bawk a, hetiang hi chu inremna a ni lo va, inhmuhsitna a ni zawk,” tiin Thawhtanni khan a sawi niin an sorkar thupuanna chuan a tar lang.
Kar hmasa khan Trump-a hian Israeli parliament-a Gaza-a Israel leh Palestinian hel pawl, Hamas-in inkahhai an kal tanpui tur puala thu a sawinaah Washington-in Tehran nen ‘inremna’ a siam thei a nih chuan hlawhtlinna ropui tak a ni dawn tih a sawi a ni.
“US president khan inchhuak takin Iran-a nuclear industry bomb-in an tichhia tih a sawi a. A tha vek a, a suangtuahna chu lo vawng zel rawh se!” tiin Khamenei-a chuan a sawi.
“Iran hian nuclear hmun a nei emaw, nei lo emaw, America hian eng nge tih tur a neih? Hetianga rawn inrelhna hi chu a fel lo va, a dik lo va, intihluihna mai mai zawk a ni,” a ti.
Khawthlang ram chak leh liante hian Iran hi uraniaum a chhekte tichaka nuclear bomb siam tumah an ngai a, an hmalakna chu tawpsan turin an duh a. Tehran erawh chuan ralthuam siam tumna a nei loh thu sawiin nuclear programme an neih chu vantlang hman tur zel chauh a nih thu a sawi.