US-in India tana Russian tuialhthei lei a phalna pawh sei tum lo

US Treasury Secretary Scott Bessent-a chuan India-in Russian tuialhthei a lei phalna an pek chu an pawt sei (renew) dawn lo tih a sawi.
White House-a thuthar lakhawmtute a kawmnaah Bessent-a chuan, “Russian tuialhthei chungchanga lei phalna kan renew dawn lo va, Iranian tuialhthei lei phalna pawh kan renew dawn lo,” a ti.
US chuan Indian tuialhthei thlifimtute chu ni 30 chhung ‘a lailawk atan’ Russian tuialhthei an lei theihna tur ngaihhnathiamna a pe a, hei hi Iran leh US-Israel inkara buaina chhuak mek kaihhnawiha khawvela thil man sang chhoh zel tur avanga harsatna lian a thlen loh nana tih a ni.
US Treasury Secretary Bessent-a’n X-ah ngaihhnathiamna pek hi a puang a, he phalna lailawk avang hian Moscow-in sum lama hlawkna lian tham a hmuh phah dawn lo tih a sawi bawk.
Trump-a sorkara thuneitu sang chuan Iran-in ‘khawvel puma energy hren’ a tum avangin hun eng emaw chen atana ngaihhnathiamna hi khawvel pum huapa indaih lohna tihziaawmna tura a tih a nih thu a sawi.
“India hi US thawhpui pawimawh tak a ni a, New Delhi hian US tuialhthei a lei a tihpung kan beisei tlat a ni,” tiin treasury secretary hian X-ah a tar lang.
February thlaa US leh Israel tang dunin Iran-a beihpui an thlak tan atang khan Iran chuan tuialhthei leh bungraw dang phurhna kawng pawimawh, Strait of Gormuz a khar a, hei vang hian India leh ram dang tam takah indaih lohna a awm phah a. Harsatna lian a thlen loh nan Washington chuan Delhi hnenah hian lei a phal tawh loh, Moscow atanga lei phalna chu ni 30 a pe a ni.