Trump-a’n inpe tura Iran a tih hnuah Israel-in bei zui zel

Trump-a’n inpe tura Iran a tih hnuah Israel-in bei zui zel
US President Donald Trump-a’n Tehran-a chengte chu insaseng tur leh Iran pawh ‘intiamkamna awm lova inpe’ tura a tih hnu lawk, Nilaini tukah khan Israeli thlawhnate chuan Iranian khawpui chu nasa tak takin an kap leh.
Israel hian sipai chakna hmangin Iran-a nuclear sawngbawlna leh an sipai rorel khawl lian tak chhut chah tumin chawlhkar khat dawn a bei ta.
Nilaini khawvar hma atang khan Tehran khawpui hmun hrang hrang kah chhunzawmin a puak êng zuai zuai reng a, inte pawh a sawi dawt dawt hlawm a. Hetih lai hian Iranian thuneitute chuan beihna an tawk leh tih an la sawi lo va; mahse, mi chengte chuan zing dar 05:00 vel atangin beng tingawng rum rum khawpa ring thil puak a awm leh tawh niin an sawi.
Zirtawpni atanga Israel-in sipai chakna hmanga a beih hnuah Iranian 224 vel thi an awm tawh a, Iran-in missile leh drone hmanga a chhan letnaah Israeli 24 an thi tawh bawk.
Zirtawpni atang khan Iran hian missile 400 chuang leh drone za tel hmangin a bei let tawh a, a tam zawk hi Israeli air defence system hmanga lo danchah a ni thung.
International Atomic Energy Agency (IAEA) chuan Nilaini khan Israeli thlawhnaten lei hnuaia Natanz uranium enrichment site centrifuge hall-te a tichhia tih a puang.
“Thlalem atanga thla lakah lei hnuaia uranium dahna hmnunte pawh a khawih tel ngei tih a lang thei,” tiin IAEA chuan a tar lang a, hei hi lei hnuai rila Iranian hmun kah a ni tih finfiahna hmasa ber a ni a. He hmunah hian Iran chuan uranium 60% vela tihthianghlim sa centrifuge 10,000 vel a chhek a ni.
Iran hian nuclear program a kalpuite chu a muanawm zawng vek a ni tih a sawi a, khawthlang ramte leh IAEA erawh chuan Tehran-in uranium a sawngbawlte hi nuclear ralthuam siam mai theihna khawp niin an sawi thung.
Israel hian Iran-in an sipai chief commander atana an ruat thar, General Ali Shadmani-a chu an that lehnghal niin a insawi bawk.
Shadmani-a hi kar hmasa thleng khan hriat a la hlawh lo va, Khatam al-Anbiya Central Headquarters-ah commander niin Israeli-ten sipai lal an thah hnuah a aiawh tura ruat a ni.
Israeli sipaite hian Mehrabad International Airport bulhnai pawh an la kap dawn niin an sawi a, mihring chenna hnaiha sipai leh industry awmna hmunte an bitum dawn thu an sawi a, hei hian civil mite tawrhna a thlen hlauhna a lian hle.