Trump-a’n Iran nena inbia anga a sawina Tehran-in dawt tihsak

Trump-a’n Iran nena inbia anga a sawina Tehran-in dawt tihsak
President Donald Trump-a’n Iranian thuneitu tute nge an nih hriat lohte nen an inbiak avanga an power grid beiha a vauna kalpui rih lova a insawi laiin Tehran chuan US nena inbiakna an neih thu a sawi thung.
European thuneitu pakhat chuan ram pahnihte inkarah inbiakna a awm lo tih a sawi bawk a. Egypt, Pakistan leh Gulf ramten inbia ti an thehdarh niin a sawi a. Pakistani thuneitu leh thu lakna dang pahnihna chuan Reuters hnenah tun kar chhungin Islamabad-ah indo tihtawpna tura inbiakna a awm tur thu an sawi mek bawk.
Trump-a hian Thawhtanni chawhma khan a Truth Social platform-ah US leh Iran chuan ‘Middle East-a indona awmte chu a famkim leh a vaia chin fel a nih theih nan’ inbiakna tha tak leh rahbi thar an neih thu a tar lang a ni.
Inbiakna avang hian a hmaa beih a tum, Iran energy grid tihchhiat a tumna pawh ni nga chhung atan a sawn hlat thu a sawi bawk a. A thu puan hnu lawk atangin share man a tisang a, tuialhthei man a tlahniam a, barrel khat $100 hnuai lam a ni zui nghal a, hei hi kar tawp lama a vau leh Iran-in chhan let a intiam avanga sumdawnna a tlak hniam duai duai hnu a ni.
Trump-a hian a hnuah thuthar thehdarhtute hnenah indo hmaa Iran lo dawr tawh, a special envoy Steve Witkoff leh a makpa, Jared Kushner te chu Pathianni tlai khan Iran thuneitu lawk ber nen an inbia a, Thawhtanniah pawh chhunzawm tur angin a sawi zui a ni.
“Inbiakna tha tak tak kan nei a. Khawiah nge min hruai thlen dawn kan en zel ang. Inremna lian tak tak kan nei a, a zawng zawng deuhthaw a ni,” tiin Florida a chhuahsana Memphis a pan hmain thuthar thehdarhtute a hrilh.
Memphis a thlen hnuah Washington chuan Iran nen ‘hun rei tak chhung inbiakna a lo nei tawh a, ⁠tun tumah chuan sumdawnna an sawina a ni,’ tiin, “Mi tin tana thil tha takah a tawp thei niin ka hria,” a ti.
Witkoff-a leh Kushner-a nena inbia Iranian thuneitu hi a hming a sawi lo va; mahse, “Zahawm leh hruaitu nia ka hriat hi kan dawr a ni,” a ti.
Israeli thuneitu leh thil hrechiangtu dang pahnih chuan Iran atanga betu hi Iran parliament speaker chak tak, Mohammad Baqer Qalibaf a nih thu an sawi.
Hetih lai hian Qalibaf-a chuan X-ah US nen inbiakna hi a la awm lo tih a sawi thung a, he rawtna hi sumdawnna tihbuai tumna mai a nih thu a sawi.
“US nen hian inbiakna engmah neih a la ni lo a, thuthar dik lo hmangin sum leh tuialhthei sumdawnna khawih danglama US leh Israel talbuaina luipui atanga tlan chhuahna atan an hman a ni,” tiin a tar lang.
“Iranian-te hian beitute hremna famkim leh inchhir tak takna pek an phut a. He thil tum hi tihhlawhtlin a nih hma chuan Iran thuneitu zawng zawngte chu an supreme leader leh mipuite lamah an tang vek a ni,” a ti.
Iran-a sipai tha bik, Revolutionary Guards (IRGC) chuan US hmunhmate beih an tum thu an sawi a, Trump-a thusawi chu ‘rilru lama beihpui thlakna,’ ‘awmze awm lo’ tih sawiin Tehran beihnaah nghawng a nei lo niin an sawi.
IRGC chuan Thawhtanni zan khan Israel khawpui eng emaw zat an beih thu an sawi a, Dimona leh Tel Aviv bakah US hmun eng emaw zat an bei tih an sawi.
Hetih lai hian Iranian Foreign Minister Abbas Araqchi-a chuan Strait of Hormuz chungchangah Omani foreign minister nen an inbia a, ram pahnihte chu inbiak zel ni se an duh tih a sawi.
Iran hian khawvela tuialhthei leh leh liquefied natural gas phurh hmun ngaa thena hmun khat vel kalna Strait of Hormuz hi a khar a. Trump-a’n hawng turin a ti a, Tehran chuan US leh Israel-in an beihna an tihtawp hma hawn a tum lo thung.
Pakistani thuneitu pakhat chuan US Vice President JD Vance-a bakah hian Witkoff ⁠leh Kushner ten tun kar chhungin Islamabad-ah Iran thuneitute an hmu dawn niin an sawi a, hei hi Trump-a leh Pakistan sipai hotu, Asim Munir ten an inbiak vang niin an sawi.
White House chuan Trump-a’n Munir a biak thu hi a sawi tawh a. Inbiakna awm tur sawi hi White House chuan a la puang lo thung a, Pakistani prime minister pisa leh foreign ministry pawhin engmah an la sawi lo.
Iran hian Trump-a’n an power plant-te beiha a vauna chu chhangin Middle East-a US tangrual ramte hmunhma a bei ve dawn tih sawiin hei hian khawvel puma energy inpekna a tihbuai nasain a rei thei dawna rinna a siam.
February 28-a US leh Israel tang dunin indona an kalpuiah hian mi 2,000 chuang an thi tawh a ni.