Tu nge Lottery King Santiago Martin?

Lottery ticket hralh hmanga mihausa tawntaw chu India Electoral Bonds Scheme hmanga political party te hnena sum pe hnem ber a ni. Santiago Martin a company Future Gaming and Hotel Services Pvt. Ltd chuan April 2019 atanga January 2023 chhungin electoral bonds 13.68 billion rupees hu lawih leiin a donate a ni.
Electoral Bonds Scheme chu rorel lai Bharatiya Janata Party te ruahman a nih angin a hlawkna tel lian bertu an ni bawk a, kum 2018 atanga 2024 inkar chuhnga he bonds atanga donation awm zawng zawng zahve vel lawih chu BJP ten an hui a ni.
Martin company tena bonds 5 billion rupees chuang an lei chu chhim lam state Tamil Nadu a rorel mek Dravida Munnetra Kazhagam (DMK) party ah a lut bawk a, Martin hian sumdawnna Tamil Nadu a tan a ni bawk.
Martin hi mirethei atanga hausa ta thut thut niin nitin inhlawkchawp thin atanga lottery empire dintu niin a lottery empire chuan India mai ni lo Bhutan thlengin a huam bawk.
Kum 63 a upa ni tawhin sawisel neuh neuh tawk reng a ni bawk a, political scandal hrang hranga hmehbel niin lottery fraud a inhnamhnawiha puh a ni bawk.
Kum 1961 khan Andaman island ah piangin tleirawlte a nih laiin Myanmar-ah nitin inhlawhfa in a kal a. Kum 1980 chho khan India ramah letlehin Tamil Nadu a thingpui dawrah a inhlawh zui a.
Tamil Nadu a lar em em Lottery ticket a bik taka mirethei tena an buaipui em em chuan a hip hle a, lottery ticket hralh sumdawnna chu luhchilh zuiin millionaire ah a siam zui ta a ni.
A lottery ticket dawr hmasa ber chu Coimbatore city-ah a hawng hmasa ber a, kum rei lo te chhungin competitor dang pahnihte khumin Tamil Nadu a lottery ticket hralh hnem ber a ni zui ta a ni.
Martin chuan “two-digit” lottery tickets – scratch card digit pahnih tarlanna ticket leitu tena winning number a nih leh nih loh live telecast a an hriat mai theihna chu kalpuiin a larpui hle.
Instant money draw chuan ticket hralh tipungin chutihrual chuan a hip a nat em avangin mi tam tak tlakchhiatna a thlen zui thung.
Martin lottery ticket chuan thenawm Karnatka leh Kerala state te pawh tuam zui nghalin a hnuah hmarlam leh north-eastern India thlengin a inzarpharh zui a ni.
Kum 2001 khan rediff.com tena an interview naah Martin chuan nitin lottery ticket 12 million a hralh tiin a sawi a. A company leh state sorkar tam tak te chuan lottery ticket hralh kawngah inremna an siam zui ta a ni.
Martin chuan nitin Tamil Nadu sorkar hnenah sales tax 350,000 rupees a pe ziah anga chhut a ni a, Sikkim sorkar hnenah pawh chhiah advance in Rs 759,000 a pe tia sawi a ni bawk.
“Ka hlawhtlinna chhan chu ticket leitu te pscyhology ka man vang a ni a, he sumdawnna tricks te ka hriat vang a ni bawk” tiin interview a neihnaah a sawi.
Mahse Martin chu income-tax department te chhui chian ni thovin ticket hralh loh atanga prize money la thin leh lottery draw rigging kalpui thina puh a ni a. Mahse, hei hi chu amah tihchhiat tumtu tena an beihna tiin an insawithiam ve thung.
Kum 2003 khan khatihlaia Tamil Nadu chief minister J Jayalalithaa chuan lottery ticket hralh a ti tawp a, a chhan ber pawh lottery ticket lei avanga mi tam tak te an tlakchhiat vang a ni.
Kum 2011 khan Jayalalithaa in thuneihna a chan leh hnuah Martin chu man niin thla eng emaw zah lung in ah khung a ni nghe nghe a, man a nihna chhan erawh ram lei chungchang thilah a ni thung.
Kerala-ah pawh Martin company chuan lottery fraud thubuai a nei a. Kum 2023 khan financial crime unit te chuan Sikkim state a lottery fraud case ah Martin leh a thuihhruai te property dap thutin assets leh bank deposit 4.5 billion rupees hu vel an man sak bawk.
Future Gaming website chuan an company chuan sumdawnna hrang hrang real estate, hospitality leh steel lam pawh an luhchilh thu a tarlang a. Electoral bonds lailan a nih hma pawhin Martin hi political party te nena inzawmna nei tha anga hriatlar tawh sa tho a ni.
Kum 2007 khan Keral-ah political scandal awmin khatihlaia communist chief minister VS Achuthananda chuan an party in Martin hnen atanga political donation Rs 20 million an dawn chu a duh loh thu a sawi a, a hnuah pek let leh a ni zui nghal a ni. Khatihlai khan Achuthanandan an dan kalha lottery kalpui te nuaibo tuma hma a lak lai a ni bawk.
“Lottery hmangin mi pangngai ten sum tam tak an hloh a, thenkhatte phei chu an intihhlum phah hial kha tha a ti lo a ni” tiin Joseph Mathew, Achuthanandan adviser chuan a sawi.
Kum 2011 khan Martin chuan Tamil-language film Maxim Gorky novel Mother behchhana siam a script pawh DMK leader leh Tamil Nadu chief minister hlui M Karunanidhi ziah chu a produced a. He film budget hi 200 million rupees vel nia sawi a ni.
Kum 2019 khan tuna Tamil Nadu chief minister ni mek MK Stalin chuan magazine lar tak Junior Vikatan tenaq Martin an DMK hnena donation Rs 5 billion a pek theih nana inremna siampuia an chhuah avangin defamation case a file phah a, Stalin chuan Martin chuan an party ah donation pek a nei lo a ti.
Mahse electoral bonds data tihchuhah takah DMK rival te chuan state a lottery khap a ni chungin eng vangin nge DMK te chuan Martin hnen atangin donation an dawn tiin zawhna an siam thung.
Martin family te hi political party hrang hranga inhnamhnawih niin a makpa chu Viduthalai Chiruthaigal Katchi (Liberation Panthers Party, INDIA alliance member a ni a, a nupui Leema chu Indhiya Jananayaga Katchi (Indian Democratic Party), BJP te thawhpui member a ni thung. Chhungkua ang pawhin party hrang hrangah an insawhnghet hle.