Tualchhung thilsiam phochhuahna khar ta
Circular Lawn Raj Bhavan-a ni thum awh Grand Gandhi Jayanti Exhibition buatsaih chu Nilaini tlai khan khar a ni.
A kharna hmanpuitu larsap Dr Hari Babu Kambhampati chuan, Exhibition hian kuthnathawh leh an thilsiam hlutsak kan inzirtirna kawngah awmzia a neih a beisei tih a sawi a. Exhibition-a tel, thil zuartute leh chhimtute chungah lawmthu a sawi.
Exhibition hmang hian central scheme hrang hrang, PM Vishwakarma Yojana leh a dangte mipuiin an hriat phah a beisei tih a sawi a. Heng scheme hi uar zawka inkawhhmuh a ngai tih a sawi a ni.
Commerce & Industries director Florence Zotluangpuii sawi danin, ni thum chhung hian thil hralh chhuah atangin cheng nuai 30 vel hmuh a ni a. Sum hlawm tam zawk hi handloom & handicrafts atanga hmuh niin, eichawp thil leh eitur dahthat theihte hralhna atang pawhin cheng tam tak hmuh a ni. Exhibition chhimtu zingah sumdawnna atan bul tanna sum chungchang zawhfiah tum mi 860-in Mizoram Rural Bank dawhkan huna thawktu duty-te an dawr a. Puantahmi 500 chuangin Department of Science & Technology-in puantah software an siam, ‘Zopuan’ chungchangah dawhkan hun an dawr bawk.
Exhibition-a tel sumdawngte aiawhin hlawkthlak an tih dan leh hetiang hun tam zawk siam theih an duh thu an sawi a ni.