Tui chhunga khawsa rei record siam

Tui chhunga khawsa rei record siam
Tui chhunga khawsa rei ber record a siam tawh a, a la duhtawklo, Dr Joseph Dituri, Dr Deep Sea tia a hminglem an phuah chu ni 100 chhung tui chhungah a khawsa ta.Florida Keys a tui chhung, feet 22 a thukah, Jules’ Undersea Lodge-ah a khawsa a ni. Ani hi scientist a ni a, tui chhunga rei tak khawsakin taksaa nghawng a neih dan zirchian nan a tih a ni nghal bawk.
A hmaa hetiang record chu Jessica Fain leh Bruce Cantrell ten helai hmunah tho hian tui chhungah ni 73 leh darkar 2 leh minute 34 chhung khawsain record an lo siam tawh a, he record hi chu May ni 13 khan tui chhungah ni 74 khawsain Dituri hian a khum daih tawh a, mahse ni 100 awm tlin hrim hrim tumin a khawsa zui ta zel a ni.
Jules’ Undersea Lodge hi American hotel niin, Key Largo, Florida, USA-a awm a ni a, square feet 100 (suqare meter 9.2) a zau a ni. He lodge hi 1986 khan an hawng a, Emerald Lagoon mawnga awm niin, USA-a tui chhung hotel awm chhun a ni.
Dituri chuan, “Tui chhung feet 22 a thuk, Key Largo-ah ka khawsa a, boruak extreme taka rei tak awmin mihring taksa a nghawng a neih dan ka zir duh a ni. Hei bakah hian zirlai tak takin science, technology, engineering leh math lamah tuina thar neia an ngaihven theih nana ka tih a ni bawk,” a ti.
Dituri hian March ni 1, 2023 atanga tanin, June ni 9, 2023 thleng tui chhungah hian a khawsa a ni.