Sipai neih chak lamah
India-in 4-na hauh
India chuan khawvel puma sipai chak lam an tehna, Global Firepower Index 2025 (GFP Index)-ah 4-na dinhmun a hauh.
He nihna hian India-in ram venhimna kawnga Army, Navy leh Air Force-a tan a lakna a tilanga ngaih niin khawvela sipai chakna nei tha ber pakhat a ni mek a. Hetih lai hian a thenawm, a elpui ni ngar ngar, Pakistan chu nikuma 9-na a nihna atangin 12-naah a tla thla.
Global Firepower Index 2025 hi kawng hrang hrang 60 hmanga ram tinte sipai chakna dinhmun chhuta tihchhuah a ni a. An tehnaah hian defence technology, sum leh pai an neih dan, an awmna hmun leh hun khirh bika an dinhmun ni thei te pawh a tel.
United States chu sipai chak ber nihna hauhtu la ni chhunzawmin Russia leh China-in an dawt a. India hian zuiin South Korea, United Kingdom, France, Japan, Turkey leh Italy-ten a sang zual ram 10 nihna an hauh.
India hian tun hnaiah sipai tihchakna lamah hma a la nasa hle a, a bikin hmanrua pawh ama siam chhuah hman tumin a bei nasa a. Hengte hian lei, tuipui leh boruaka a sipai chakna a sawhnghehtir phah.
Indian Army-ah hian sipai tanglai maktaduai 1.45 an awm mek a, reserve battalion-ah maktaduai 1.15 leh paramilitary force-ah nuai 25 chuang a nei bawk a. Hmanraw changkang taka thuam T-90 Bhishma leh Arjun tank, BrahMos missile leh Pinaka rocket system te chu a hmachhuan a ni.
Indian Air Force pawhin hma lam pan zelin thlawhna 2,229 a nei a, heng zinga 600 chu fighter jet a ni a, helicopter 899 leh support aircraft 831 a nei bawk a. A ralthuam kawl mek zingah Rafale leh Su-30MKI fighter jet te chu a chhuan zual niin missile system changkang – Rudram, Astra, Nirbhay leh BrahMos hman tur a nei bawk.
Indian Navy-ah hian sipai 1,42,251 awm mekin indo lawng leh tuihnuailawng 150 a nei a. Indo thlawhna phur thei, INS Vikramaditya leh INS Vikrant a neih bakah nuclear submarine P-8i maritime reconnaissance aircraft a kawl bawk.
Lawng thar tur 50 chuang sak mek niin hengte hi peih a nih hunah chuan lawng sipaite tha tichak lehzual tura ngaih a ni.
India-in sipaia hma a sawnna hi eibar dinhmun leh ram dang nena inkungkaihna thil avanga nasa taka thang ni bawk niin mi thiamte chuan an ngai.
Sipai neih chak lamah India-in 4-na hauh
Get real time updates directly on you device, subscribe now.