Tui lian vangin Imphal-a damdawi in lian bera damlote sawn chhuak

Tui lian vangin Imphal-a damdawi in lian bera damlote sawn chhuak
Manipur-a sorkar damdawi in lian ber, Imphal-a Jawaharlal Nehru Institute of Medical Sciences (JNIMS)-a damlo awm mekte chu tui lian dinhmun a that loh zel avangin hmun dangah sawn chhuah an ni.
Damdawi in hung chhung leh a chhehvelah tui chim chin a san zel avangin damlo awm mekte hi rang taka sawn chhuah turin thupek chhuah a ni.
“Damlote him nan ward-a damlo awm zawng zawngte chu a rang thei ang bera sawn chhuah tur a ni a. Hei bakah hian tumah thupek thar a awm leh hma chuan dah luh belh tawh lo tur a ni a. He thutlukna hi hun khirh tak kan tawh mekah kan damlote tana tha tur leh himna atana siam a ni,” tiin JNIMS chuan thu a chhuah.
Manipur-ah hian Imphal East leh Thoubal district-ah chuan an state chhung hmun tam takah ruah a sur rei deuh tawh avangin in 5,000 chuang leh lo zau tak tuiin a chim tawh a. Kawngpui pawimawh tak takte pawh lei min avangin a ping mek bawk.
Iril chu Imphal district-a Kshetri Awang Leikai-ah Thawhtanni tuk atang khan a kuang atanga luang liam tanin tui a tilian nasa hle.
Phaizawl bikah chuan Nilaini thleng khan sikul leh college khar vek a la ni a, pawh sei pawh a ngai mai thei tih thuneitute chuan an sawi.
India Meteorological Department (IMD) chuan Pathianni thleng hian Assam, Meghalaya, Nagaland, Manipur, Mizoram leh Tripura-ah chuan ruah tam vak lo leh hmun thenkhatah tam deuh hlek la sur thei niin an sawi lawk.