Tuialthei harsa vak rih lo

Rel kawng chhiain Mizoram a nghawng a, tuialthei pawh sorkarin rei vak lo chu a ‘control’ a, mahse tuialhthei lamah Mizoramin hasatna a la tawk vak lo.
Aizawl khawpuiah lirthei a ngai rengin an tlan tiin a sawi theih a, taxi leh two wheeler te pawh tlan an tlem phah lem lo.
Directorate of Food, Civil Supplies & Consumer Affairs hotute pawhin harsatna hi a nasa lo tih an sawi a, “Kan harsa lutuk han tih tur khawp chu a ni lo,” an ti. Chutih rual chuan inrenchem erawh a tul thu an sawi.
Rel kawng chhiat hnuah tuialhthei lakluh chungchangah hmasawnna a awm tih an sawi a, May ni 8 khan Mizoramah petrol kilolitre 128 a luh a, lakluh zat pawh hi a pung hret hret an ti. Chutih rual chuan kilolitre 128 hi a tam tia sawi tur chu a ni lo tih an sawi a, rel kawng chhiat hma khan kilolitre 150-160 te a lut thin a, chutiang chu a la ni pha lo an ti.
Rel kawng chhiat hnuah Guwahati Depot atangin tuialhthei hi lakluh a ngai a, a hma kha chuan Silchar atanga lak thin a ni. A lakna a hlat tak avangin a phurtute an thang rei a, chu chu tuna Mizoramin harsatna a tawhna ber chu a ni.
Rel kawng chhia hi north east frontier railway hotute’n May ni 10 velah chuan siamthat hman an inbeisei a, an peih hman dawn em tih thu-ah Mizoram sorkarin thu thar dawn a nei rih lo tih thu dawn a ni.
Rel kawng chhia hian eirawngbawlna gas lam a nghawng loh thu Food, Civil Supplies & Consumer Affairs department hotute chuan an sawi a, eirawngbawlna gas hi Borkhola Bottling Plant atanga lak a nih thu leh, Borkhola lam hi rel kawng chhiain a nghawng loh thu an sawi.
Food, Civil Supplies & Consumer Affairs department hian Thawhtanni zan atang khan tuialhthei hi an control lo a, filling station neitute’n an neih ang ang an ‘free sale’ hian inchuh a awm loh phah an beisei thu an sawi.