Tuichangah vote thlak pung

MLA inthlan neih zawh takah 22-Tuichang bikah 2018 MLA inthlanpui nena khaikhinin vote tlak dan a pung vek.
Khawzawl district-a Assembly bial awmchhun Tuichangah hian voter mipa 8713 leh hmeichhia 8795, a vaiin 17508 an awm a. Polling station 28-ah hian mipa 7301 leh hmeichhia 7125, a vaiin vote thlak 14426 awmin, vote tla percentage hi 82.39 a ni.
2018-ah hian EVM-a vote tla 79.06% a nih laiin 2023-ah EVM a vote tla 82.39% a ni a. 2018-a vote tla zawng zawng, postal ballot nena chhiarin 80.07% a ni a, 2023-ah hian postal ballot nen chuan 85% kai pha thuak tura ngaih a ni.
2018 inthlanah 80% aia tam vote tlakna polling station 10 a awm a, 2023-ah 80% aia tam vote tlakna polling station 23 a awm. 2018-ah 85% aia tam vote tlakna P/S 3 a awm laiin, 2023-ah chuan 85% aia tam vote tlakna P/S 10 a awm.
2018 inthlana vote tlak tlemna ber Vangtlang P/S (74.34%) ah 2023 inthlanah vote 86.02% a tla tawh. 2018-a vote tlak tam na ber Hmuncheng P/S (91.62%) ah 2023 ah la sang lehzualin 92.74% a tla a, he biala vote tlak that na ber a ni nawn a ni.
2018 inthlanah hian vote tlak tlemna ber P/S ah vote 74.34% a tla a, tun tum inthlanah he bial P/S zinga vote tlak tlemna berah 77.57% a tla a ni.
Kumin inthlanpuiah Tuichang biala town zinga chhiar Khawzawl leh Khawhaia polling station 13-a vote tla average chu 81.3% a ni a, hemi pawn (thingtlang) polling station 15-a vote tla average chu 85.21% a ni. 2018 inthlanpuiah Khawzawl leh Khawhai P/S a vote tla hi 77.9% niin, hmun dang P/S a vote tla chu 81.77% a ni.
Hetihlai hian Tuichang biala vote thlak leh a kaihhnawih thlirletin Nilaini khan he bial viltu general observer Amit Singh Bansal hoin election hotute leh political party aiawhte an thukhawm a. Thil dikhlel leh chhuizui ngai a awm lo tih pawm tlan a ni.