Tuichangral Games 2026 a tiak ta

Tuichangral Games vawi 15-na chu April 23, Nilaini khan zawh fel a ni a, football-ah Sialhawk an champion. Football-ah Sialhawk an chungnun laiin Wrestling ah East Lungdar an champion ve thung.
Khawhaia neih Tuichangral Games-ah hian Football, Volleyball, Boxing, Weighlifting leh Wrestling hmangin inelna neih a ni a. Football leh Volleyball hi senior team te inelna niin, football mipa leh hmeichhiaah Sialhawk in ro an rel a, an champion ve ve. Sialhawk mipa teamin final-a an khingpui Tlangmawi chu 4-2 in an hneh a. Hmeichhe final-ah Sialhawk in an khingpui Mualcheng chu 1-0 a hnehin an champion ve bawk.
Inelna ngaihhlut hlawh ber zinga mi Volleyball final-ah Volleyball thiam khua leh inelna thlengtu ni bawk Khawhain Volleyball mipa-ah inelna thlengtu Khawhai in Tualte an hmachhawn a. An tualzawlawh nget set hloh lova chakin an champion. Hmeichhe final-ah Tualte chuan an khingpui Biate chu straight set a hnehin an champion ve bawk. Volleyball final hi Thawhlehni zan khan khelh a ni a, entu an thahnem hle.
Wrestling champion East Lungdar
Tarlan tawh angin Tuichangral Games-a inelna pathum; Boxing, Weighlifting leh Wrestling te hi kum 16 hnuai lamte inelna a ni ve thung a. Boxing leh Wrestling-ah East Lungdar chu team champion an ni.
Tuichangral Games vawi 15 naah Nilaini khan Wrestling a inelna bik zawh fel a ni a, East Lungdar chu team champion an ni. Champion team East Lungdar hian Gold Medal 6, Silver medal 2 leh Bronze Medal 5 an la a. Pahnihna Khawhaiin Gold Medal 1, Silver Medal 4 leh Bronze Medal 8 an la. Team champion E. Lungdar leh Pahnihna Khawhai te hian trophy an dawng ve ve.
Tuichangral Games 2026 a Wrestling inelna hi Nilaini khan khar vel a ni a, kharna hun hi Pu Ngurthansanga, President MWA in a hmanpui.