Tuiin a chim puka tangte chhanchhuah tumin bei mek

Laos-a tui lianin a chim puk chhunga chawlhkar khat dawn tang tawh mi pasarih chhanchhuah tumin thawktuten an bei mek.
Mi pasarihte hi ram lailia Xaysomboun province-a thingtlang khaw mi pawl pakhat zinga mi an ni a, kar hmasa Nilaini khan puk chhungah hian rangkachak leh ramsa zawngin an lut a, ruah sur zuiin puk luhna chu lei minin a hnawh zui avanginan chhuak thei lo.
Chhanchhuah hna thawktuten video an tihchhuahah chuan tuiin a chim vek puk chhungah cave diver-te chu awng zim takah an lut tih a lang.
Kum 2018-a Thailand puk thuk taka tang, tleirawl footballer team chhanchhuahnaa tel mi thiam bik eng emaw zat pawh tun tum chhanchhuah hna thawhnaah hian an tel.
Hima chhuak thei pakhatin thuneitute hnenah a thiante tang chungchang hi a hriattir nia sawi a ni.
Laos-a Rescue Volunteer for People kaihruaitu, Bounkham Luanglath chuan pukah hian thingtlang mite chu rangkachak zawngin an lut fo niin Associated Press a hrilh.
Lei hnuai thuk taka inzar pharh puk chhung hi a zim hle a, thenkhat lai phei chu 50cm (20in) vel chauhva zau a ni tih chhanchhuaktute chuan an sawi.
Chhanchhuah hna thawktute chuan puk atanga tui pump chhuah tumin hma an la mek bawk.
Thawhtanni khan puk hma lama lung thenkhat chu an thianin a chhung thuk zawkte pawh an thlithlai thei a; mahse, tui chim chin a san zel avangin an kal thui thei lo niin an sawi.
Tun thlengin dam an awm tih hriatna an la nei thei lo va; mahse, Thai chhanchhuaktu pawl, Metta Tham Rescue-a mi, Kengkard Bongkawong chuan an tang nia an rinna hmun hnaih tak an thleng tawh niin a ngai a, ‘metre 20 (65ft) aiin a hla tawh lo’ niin a chhut.
Thawhtanni zan khan Kengkard-a chuan Facebook-ah, “Nileng zankhuain tui pump chhuah a la ni reng,” tiin a dah bawk.
Kengkard-a hi kum 2018-a Thailand-a Chiang Rai province-a tlang hnuaia tui lianin a chim puk chhunga chawlhkar hnih chhung an tan hnuah Thai naupang 12 leh an football coach-te hruai chhuahnaa tel a ni.