Tuipui aiin Tuichang a lian zawk !!

Tuipui aiin Tuichang a lian zawk !!
Ningani zanah Tata SK 712 Pro Volleyball League semi-final hmun-ruak la awm pakhat in-chuhin Tuichangral leh Tuipuiral inhnehtawk takin an insu a, deciding set-ah inkhel awpbetin Tuichang-ralin hmunruak hnuhnung an luahkhat thei hram a, 3-2 hnehna an chang.
R. Dengthuama In-door Stadium, Mualpuiah team pahnihin palina an inchuh a; vawi hnih set la hmasa zawk an nih hnuah Tuipuiral thahrui a zuai a, 23-25, 25-23, 18-25, 25-20, 15-5-in Tuichangralin an hnehlet.
Durtlang North hneh zo hlim Tuichangralin an elpui aia point khata sang zawk ni chungin khelmual an lut a; set thumna thlengin phurna leh inrintawkna nen thiam takin Anurag Rawat an chhawr thei.
Inbeihna nasa leh boruak sang karah set nga chhung mar taka inlan tluan turin Anurag a tawng-khawng a, set hnuhnung pahnihah tlahniamin, Tui-puiral an hnungtawlh zui ve nghal. Dinhmun tha leh beiseiawm atangin an zuihral a, Pro Volleyball-a an tel hmasak berah uiawm takin an tla.
Chuti chungin Delhi tlangvalin point 59 hmuin 22 a hloh a, vawi nga an khelhah a tum lina’n D3 Business Player of the Match lawmman a dawng. A team tlangpui zo lo mah se mimalin a langsar fal a, a khelh hnuhnun vawi thumah point 174 ngawt thawkchhuakin, hriatreng tlak sulhnu nen Mizoram a chhuahsan thei dawn.
|um khat chiah chak chungin Tuipuiralin point li an hmu a, pangna niin league an khar. Tuichangralin point li tho kawl mah se vawi hnih an chak avangin an sang zawk a, league khelh ngaa chak fai vek TNT nen semi-final-ah an intawng dawn a ni.
Tuipuiral tan an thlen chin apiang thil thar zel a ni a, set hmasa berah 24-19-a sang zawk an nih hnuah point li an hloh zawn a, Anurag chuan boruak rit vaikiangin a chhan a, deuce ngai loin an tlang.
Aizawl pawn atanga Pro Volleyball-a tel hmasa ber Tuichangralin season khat an hmanna 2018-ah final an lut nghal a, a kum lehah knockout round thleng zo loin tla mah se nikumah league-a sang ber dawttu ni chungin semi-final an khel.
Set hnihnaah tawnhriat nei leh Mizo player nei tha zawk an nihna Saidingpuia Sailo chuan a lantir a, Vinod Khatkar nen inkawp rem tial tialin inelna san vanglai an tawng chho a, 23-23 a nih laiin Khawhai chhuanvawr Saitea’n a vaw tla a, Anurag-a hlap a dang tla zui leh nghal.
Mahse, set an lak ve hnuah Tuichangral an nghet thei lo a, point thum leh lia hniam zawk ni chungin an um zui a, ho taka ball an tlaktir fo bakah hlap tlak an harsat tel bawk. Insawrbingna thar nen Anurag chuan a hnung leh hma atangin nuam ti takin a vaw ve thung a, an inkar tizau zelin mipui au thawm atangin Tuichang aiin Tuipui a lian zawk!
Set an hloh leh chuan Tuichangral an tla dawn a, coach David Fanai chuan thutlukna huaisen tak siamin setter Hmangaihthanga a thlak a, a tawp thlengin ball vawtu zinga mi Lalrinchhan a hmang tluan.
A hma aiin player hrang hrang theihna an hmang daihzai a, Vinod leh Saitea bakah Vanlalthla-muanpuia Sailo leh H. Lalrinmawia’n an ball hmuh an chhawr thei bawk. Team boruak siamtha chhoin Saitea’n 15-12-a hma an hruaina’n a hlap a, a tlak ruala a ke tinain Hunthar an hneh loh tum ang bawkin lakchhuah a ni.
A inhliam lai thleng khan Saitea hi an rin ber niin, point riat hloh mah se vawi 20 a vaw tla hman. Tuichangral tan thil pawi ni mah se paukhauh takin an bei zui a, net bula lehlam ball vuak dang tura an luhtir Thangminlal chuan team tanpui telin inkhel boruak an thlakdanglam.
Set lina laihawl atangin Anurag chuan ngai a awh tawh lo a, a chau tih hriatna’n ball vuak sual leh point hloh an nei fo a, Tuipuiral an tlafual telh telh. Inrinni khan Durtlang North hmaah set hmasa pahnih an hloh nghal a, Delhi spiker-in point 60 chuang hmuin hnehna kawngah hruaikir thei mah se Ningani zanah set nga a tlin tawh lo.
Tuichangral an phur telh telh a, a chak tur tihfelna hnuhnungah rin ngamin Vinod a inlan thar leh a, a tawpah vawi 22 hlap tlain Saitea a khum a, point an hloh zat a inang. Muanpuia leh Rinmawia’n an hmabak hlen bawkin fal takin lehlam an kalsan.
Tuipuiralin Anurag hmantangkai leh viau an tum laiin point a hloh zawn a, a kutthlak a dik tawk tawh loh avangin vuak tlak a harsat. Hun pawimawhah duhthlan tur dang an awm chuang lo a, KC Laldawngzela’n vawi hnih a hlap tla tih loh PC Vannunmawia leh Vanlalremruatpuia’n court pawnah ve ve an vaw chhuak.
Point nga chiah an hmu ve hman tihin Tuichangralin 11-5 atangin hnehna ban an phar zui a, team inelna tak takah bialtu MLA Ramthanmawia hmuh laiin Tuipuiral an nem.
Mizo player zinga thawhhlawk ber Nunmawia’n point nga hmuin tum thum a tisual a, Anurag nen an inthlau hle a ni.