Tung chi chin tur thawnchhuak

Tung chi chin tur thawnchhuak
Mizoram district 8-a chin tur tung chi kg. 4500 chu Agriculture & Farmers Welfare minister PC Vanlalruata chuan Zirtawpni khan a vailiam.
Agriculture minister chuan loneitute din chhuah theihna tur chu a thil vei ber a ni a. Tung chin chu Mizote rilru sukthlek nena inmil, Mizoram leilung mil bawk si a nih avangin loneitute tan thil tih chi tak a ni dawn tih a sawi a. Kum 1990 chhoah sawrkar hmalaknain Mizoram hmun hrang hrangah nasa taka chin ni tawh mah se, a hralhna kawngah tunlai angin khawl leh inbiakpawhna a la that tawk loh avangin a hlawhtling ta lo tih a sawi a ni.
Tunah India ramah tung hriak (tung oil) mamawhna a sang zel a. A tam zawk chu ram dang atanga lakluh vek a nih avangin Mizorama kuthnathawktute tan tung chin chu tharthawh leh tlak nia hria in, kum 2025 atang khan Agriculture department kaltlangin Saitual, Khawzawl leh Serchhip district-ah awmze nei zawka chin tan leh a ni a. Kum 2026-ah phei chuan zau zawkin district 8-a khaw 105-ah chin a ni dawn tih a sawi a ni.
India rama tung lei leh hralh lama hmalatu lian, Vorya Enterprise New Delhi neitu Himanshu Bansal chuan inbiak hmuh theihna kaltlanga telpuiin Agriculture department-a thawkte leh tung chingtu mi engemawzat an tel a. Himanshu Bansal hian India ramah tung lei tur duhkhawp an hmuh zawh loh avangin China leh Vietnam atangin an lei nasa a; oil mamawhna sang chho zelah tung chingtute tan a hralhna kawngah harsatna a awm loa, tung lei turin farmer-te nen inremna siam a duh tih a sawi a ni.
Tung hriak hi bungrua (furniture) tih tletna atan, varnish, paints leh leather tih tletna atan leh thil dang hrang hrangah an hmang nasa a; chin a nih atanga kum thum velah an rah tan thei a, kum 30 vel thleng an rah thei. A kung karlakah hian thlai dang – vaimim leh behliang chin theih a ni a, vaimim leh behliang hi sawrkar laipui ruahman angin NAFED/NCC ten minimum support price-in an lei thei tih sawi a ni.