Turkey-ah inthlan thawh hnihna

Turkey hma lam hun atana vision hran hlak nei pahnihte chu May 28 hian presidential election thawh hnihna neih turah an inkhing leh dawn a, a thawhkhatnaah chak zawk an awm loh avangin thawh hnihna neih ngai a ni a. President authoritarian tual tual leh candidate democracy humhim duh tia inchhal te inbeihna a ni.
President Recep tayyip Erdogan chu populist leh polarizing leader niin Turkey-ah kum 20 chhung rorelna lekkawh tawh niin May 14 inthlanah khan chakna a chang pha lo chiah chiah a. Tukrey-in inflation sang turu tawka harsatna namen lo a tawk chungin a la lar vet vet hle.
Kemal Kilicdaroglu, Turkey a pro-secular opposition party lian ber leh party tenau paruk te thlawp rawn ni bawk chuan Erdogan-a thuneihna buru tak chu chhut chhiat a intiam thung.
Kum 74-a upa bureaucrat hlui chuan inthlan thawhhnihna neih tur chu referendum tia sawiin, “Kan tana damna leh nunna tluk thawthang a ni a. Turkey chu engah nge thimah a luh dawn tihchianna tur a ni,” tiin Koilicdaroglu chuan a sawi a. “He inthlan hi inthlan satliah a ni lo, referendum zawk a ni,” tiin a sawi bawk.
Kilicraroglu chuan thlan tlin a nih chuan refugees nuai tel Turkey in a kawl mek te chu thawn haw intiamin leh Kurdish militant te nena inremna a awm theih nana inbiakna a hnawl tur thu a sawi a.
A party social democrat te chuan Turkey-a Syrians raltlan awmte chu an let lehna tur dinhmun siam that a nih hnuah kum hnih chhunga thawn haw vek a tum an ti bawk a.
Hei mai bakah hian Turkish maktaduai 8 vel lawih te, inthlan thawhkhatnaa vote thlak lo te chu vote thlak hram turin a ngen bawk a. Thawhkhatnaah khan Erdogan chuan 49.5% vote hmuin Kilicdaroglu 44.9% a hmu thung a ni.
Kum 69-a upa Erdogan chu Turkey leader ni rei ber tawh niin kum 2003 atang khan prime minister nia bul tanin kum 2014 atang khan president a ni tawh a, thlan tlin a nih leh chuan kum 2028 thlengin thuneihna a chang dawn a ni.
Erdogan kaihhruaina hnuaiah Turkey chu hnawl theih loh leh NATO ally nihnaa buaina siamtu ni bawk reng a ni a. Sweden-in Nato zawm a tum dalin a veto hmak a, Russian missile-defense system a lei bawk a, hei vang hian US chuan US fighter jet project atangin Turkey chu a thlauhthla hmak ve thung a. Chu mai ni lovin UN level-ah pawh Tukey chuan Ukraine lawng tena Black Sea port an paltlanga grain an hralh theih nan ruahmanna siamin a tihlawhtling thei bawk.
Erdogan chuan inthlana pathumna hauhtu nationalist Sinan Ognan 5.2% vote share neitu thlawpna a hmu ta bawk a. Hei hi Erdogan tan chuan lawmawm tak nia ngaih a ni.
Mahse Ogan thlawptu hard-line anti-migrant party te chuan Kilidaroglu chu an thlawp thu an puang ve thung a, inremna siamin thlan tlin a nih chuan Kilicdaroglu chuan kum hnih chhungin migrants te chu thawn haw vek a intiam thung.
Tuna a lan dan chuan Kilicdaroglu chu chak lo zawk theia ngaih a ni a, mahse, first round neiha vote thlak lo tam tak te vote thlak tura a tur hlawhtlin theiha amah an vote bawk chuan thil danglam dawrh thei tura ngaih a ni thung.
“A dinhmun a tha zawk a tih theih hauh lo va, mahse, president ni thei turin a dinhmun a tha tho thei,” tiin professor Serhat guvenc, Istanbul a Kadir Has University chuan a sawi a. Opposition tena a hma voters vote thlak duh lo te an nawrchhuah hlawhtlin theih chuan thil a inthlak danglam vek thei a ti bawk.