Tyler, The Creator album “DON’T TAP THE GLASS” No.1-ah a debut

On Jul 29, 2025 7 0

Tyler, The Creator album “DON’T TAP THE GLASS” No.1-ah a debut
Tyler, The Creator album thar “DON’T TAP THE GLASS” chu Billboard 200 (albums) chart No.1-ah a debut a, he chart-a a album No.1 kai thei palina a ni. Hetihrual hian Alex Warren “You’ll Be Alright Kid,” Ozzy Osbourne “The Essential Ozzy Osbourne,” Jessie Murph “Sex Hysteria,” leh BTS ‘Permission To Dance On Stage (Live) te pawh chart top 10-ah an lang bawk.
Billboard 200 chart hi kar khat chhunga US-a album hralh tam dan aTanga tehin chart ranking siam Thin a ni a, album hralh zat chhut nan hian album tak tak hralhna bakah streaming aTanga album hralhna tlukpui leh album-a hla a mala hralhna aTanga album tlukpui te belhkhawm Thin a ni.
“DON’T TAP THE GLASS” hi kar khat chhungin 1,97,000 hralhin, chung zinga 1,28,000 chu album tak tak hralhna niin, streaming aTangin 69,000 (on-demand official stream maktaduai 93.34) niin, hla mal hralhna chu chhiar tham a ni lo.
Tyler, The Creator album hmasa CHROMAKOPIA (2024), CALL ME IF YOU GET LOST (2021) leh IGOR (2019) te pawh chart No.1 an lo kai tawh a, tihian No.1 album pali a nei tling ta a, top 10-a lang thei album pariat a nei tling ta chiah bawk a, a album tlangzarh tawh zawng zawng chart top 10-ah an la lang vek a ni.
Chart No.1 hlui, Morgan Wallen “I’m the Problem” chu 1,42,000 hralh lehin No.3 aTangin No.2-ah a insawn thar leh a, KPop Demon Hunters soundtrack pawh 89,000 hralh lehin No.5 aTangin No.3-ah a insawn a, kar kalta No.1, Travis Scott ‘JACKBOYS 2’ chu 78,000 hralh lehin No.1 aTangin No.4-ah a tawlh ve thung.
Alex Warren album “You’ll Be Alright , Kid” chu 73,000 hralhin, No.19 aTangin No.5-ah a invawrh a, 59,000 chu streaming aTanga album tlukpui (on-demand official stream maktaduai 80.19) niin, album tak tak hralh chu 13,000 a ni a, album a hla a mala hralhna aTangin 1,000 a tling thei bawk. “You’ll Be Alright, Kid” album hi a hla hit “Ordinary” awmna niin, he hla hi Billboard Hot 100 (singles) chart-ah kar sarih a No.1 thei.
Justin Bieber album “SWAG” chu 72,000 hralhin No.2 aTangin No.6-ah a tawlh ve thung.
Ozzy Osbourne pawh a thih hnuah a hlate hralh a kal thar leh a, “The Essential Ozzy Osbourne” chu 44,000 aia tam deuh hralhin, No.134 aTangin No.7-ah a invawrh a, he album hi 2003 khan chart No.81 a lo kai tawh a, tun hi he chart-a a thlensân ber a la ni. Ozzy album- Patient Number 9 (No. 3, 2022), Ordinary Man (No. 3, 2020), Scream (No. 4, 2010), Black Rain (No. 3, 2007), Down to Earth (No. 4, 2001), Ozzmosis (No. 4, 1995), No More Tears (No. 7, 1991), Tribute (with Randy Rhoads, No. 6, 1987) leh The Ultimate Sin (No. 6, 1986) te pawh chart top 10 kai tawhin, tihian top 10 a lang thei album 10 a nei tling ta chiah a, Black Sabbath frontman a nih laiin an band album pahnih- 13 (No. 1, 2013) leh Master of Reality (No. 8, 1971) te top 10 a lo kai tawh bawk.
Jessie Murph album thar ‘Sex Hysteria” chu 44,000 hralhin No.8-ah a debut a, 35,000 chu streaming (on-demand official stream maktaduai 48.23) aTanga album tlukpui niin, album tak tak hralh chu 9,000 a ni a, hla mal hralhna chu chhiar tham a ni lo. Jessie Murph hian top 10 album a neih vawi khatna a ni.
Clipse album “Let God Sort Em Out” chu 43,000 aia tam deuh hralhin No.4 aTangin No.9-ah a tawlh ve thung.
Chart top 10 khartu chu BTS live album hmasa ber, ‘Permission To Dance On Stage (Live)’ niin No.10-ah a debut. He album hi 43,000 hralhin, chung zinga 36,000 chu album tak tak hralhna a ni a, streaming aTangin 5,000 (on-demand official stream maktaduai 6.58) leh hla mal hralhna aTangin 2,000 a tling thei bawk. BTS album he chart top 10 a lang thei pariatna a ni.