Ui talh leh a sa zawrh

The Mizoram Animal Slaughter (Amendment) Act, 2020 kan neih atanga kum 2 chuang zet a liam leh tak hnuah tunhnai khan Mizoram State Animal Welfare Board (MSAWB) chu an chairman AH & Vety minister hoin an thukhawm a, Ui talh leh a sa zawrhna tih tlem a nih theihna’n khauh taka Dan kenkawh an rel a, uisa zuar tih remna atan ui talh leh a sa zuar thinte lakah a tul anga complaint thehlut turin hma an la dawn a ni.
India ramah hian Uisa hi food safety regulations hnuaiah khap a ni sa hrim hrim a, northeast state-ah hian a bikin Mizoram leh Nagaland hian Uisa hi kan ei nasa a, dan a awm chung pawhin dan anga hmalakna hi, a lo awm a nih pawhin, hmuh tur a awm mang lo a tih theih awm e. Animal activist thenkhatin, zawrhsum atana lirtheia ui phurh kual vel an umzui a, hma an la tih loh hi chu, sawrkar dan tlawhchhana sawrkarin dan a kenkawhna hi hmuh tur a awm lo tih theih a ni awm e.
Mizoram sawrkar pawhin dan awmsa a siamthat (amend) hnua ui talh khapna dan thar a awm hnuah pawh kum hnih chuang hma la mumal lovin kan awm a ni a, tuna Mizoram State Animal Welfare Board-in khauh taka dan kenkawh a nih theih nana hma lak an tumnaah pawh hian khawtlang nena tanhona tel lo chuan hmalak a sak deuh maithei.
Eng pawh ni se, dan a awm tawh chuan dan anga kal hi kan tihtur a ni mai a. Zial zuk khapna pawh dan a awm hma kha chuan zial zuk kha khap chiah pawh ngaih a ni lova. Mahse, khapna dan a awm a, dan kenkawh a han nih hian, vawi leh khata zawm duak duak chu thil harsa a lo nih avangin vawilehkhata khauh nghal bur lovin zawi zawiin awareness campaign nen kalpui a han ni a, tunah chuan hetiang dinhmun hi kan lo ni ta a. Ui talh leh a sa zawrh khap chungchangah pawh hian awareness campaign nen a tahtawla thiam taka hmalak a pawimawh hlein a rinawm.