By Michael Lalramdingliana
Sihphir
-- Advertisement --
Kan hma lawkah khian Mizote
eizawnna leh kan hnam (culture)-a bet nghet tlat, ‘Lo vah’ hun chuan min nghak leh der tawh a. He ‘lo vah’ hun chhunga kan thawhrimna hian lo kan zawh huna kan buhzêm rim dan tur a hril thui hle dawn a ni. Lo vah kan uluk chuan ram a lo kang tha ang a, hlo thlawh leh eng ilo a sam phah dawn a ni.
“A bul tan that chu a chanve zo ang a ni” tih an sawi angin, lo vah lai atanga nunna thap leh hah taka thawktu chuan hlawhtling takin lo a zo anga, a buh tharte chu kum lo awm tur atan chhungkaw tlai a ni tawh ang.
Hmanlai kan pi leh pute khan mihring leh khawchin hriat a ni lo, tiin kumpui lingletin lo an nei a, nakkum kan dam thleng dah lo maw? tiin an buh ei tur chu an lo inhmakhua ve thin a ni. Keini hunah erawh, mihring punna sang zelah mamawhna (demand) a lo sang zel a. Chu chuan ram awm sa chu indaih lohna thlen a, kan inhmakhawsuihna chu kan buhzêm mai bakah kan buh tuhna tur atana ramngaw kan thiah dante chenin kan inhmakhawsuih a ngai ta a ni.
Tun dinhmunah chuan inhmakhawsuih ahnekin retheihna leh duhamna chuan mitdelna leh pawlawhna min thlen a. Kan mamawh piah lamah kan rilru kan hman hlek loh avangin kan ramngaw kan vah chereute chuan khawvel inkhaidiat chu a sawi nghing a, chu chuan kan tun hun leh kan hma hun atan pawn lang thei rengin min man ta der a ni.
Lo hal laia lo chhip lama ‘khau phar thawven’ an sawi ang ngawta keini mihring thluak neite hi kan Ramngaw kiam chak danah kan lo khauphar thawvenpui ringawt chuan kan kang ut ve mai ang tih a hlauhawm khawp mai. Global Forest Watch (GFW) chuan, North East India hian kum 2001-2021 khan Delhi let thum tiat lawih khu ramngaw kan hloh a, Mizoram hi a hloh nasa pawl kan ni tih inhre tel ila a tha bawk awm e.
|hal laiin Aizawl khawpui leh dai vel atang hian kan ram hi han thlir ila, kum tin lo atan kan vah chereu leh meipui kan tihchhuahte hian ka ramngaw chu ui tang ang maiin a chhuah a, hei hi thingtlangpa thiam loh a ni bik lo a, kan zavaia kan thiam loh a ni.
Thingtlang pain chin dan tha zawk leh sum leh pai dinhmun avangin a lo neih dan than chu kalsan harsa a ti a, khawpui a awmin lo vah dan dik; vawikhat vaha sum tam zawk lak dan leh hahdam zawk chu a hrilh duh si lo. Khawpui daia awmte lahin thlai thar chhuah tlem an hlauh vangin lei thatna bawlhlo leh rannung thahna bawlhlo chi hrang hrang hmangin an thlai an sawngbawl a, chu chuan keimahni leh keimahni kan inhrai mai bakah ruah surin bawlhlo an kahna hmun atanga a tlen thlak chuan kan huan bula kawrte te chu kan hrai tel a, lui têa eizawng tute leh a lo dawrtute thlengin kan inhrai ta thin a ni.
Heng vang te pawh hi a ni ang e; India rama Cancer vei tamna ber pawl kan nih chhan. Heng thingtlangpa harsatna leh khawpui daia awmte harsatna hi Agriculture thiamna hmang atangin hlawk zawk leh tlo zawk a awm.
Thingtlang pa tan terrace/bunding siam hautak mah se ramngaw an vah tluk atanga an thing kih tlukte chu lei chung hang luangral tur ven nan uluk takin terrace/bunding pian hmangin rem khawm se chu chu Logwood bunding system (Changkham ) kan tih kha a ni. Chung logwood bund awmnaah chuan awmze neiin an thlai siam tura-te chu thlangin, hunbi inchhawk (Crop Rotation)- in thlai siam se. Entirnan: Buh seng zawhah bekang hmunte siam leh in, kum tin lo thar vahna hna hahthlak tak chu an pumpelh mai bakah hlawkna tam zawk nen kan ramngaw pawhin a lo mawipui dawn a ni.
Khawpui hnaia huan kumhlun siamtute pawn lei tha bawlhlo, mihring tana a uchhuaka hman a, thihna tur paitu ni bawk si, man to taka lei ai chuan lei tha siam theitu thlaite nen chin pawlh ila (inter cropping) Entirnan: Behliang, bekang, bean. Chu chuan Mizoram Cancer rate a tihtlem mai bakah, huan siamtute tan sum sen tlemna zawk a ni.
Heng kan tarlan mai piah lamah hian kan mithiamte rawn tam ila, ram riak mi pawhin a thlamah Radio/smartphone hmangin kan mithiamte titi i ngaithla tam ila.
Kum tam kan ramngaw, ramsa, sava, leh thil nung tinrengte hi kan ngaihthah tawh a. Kan ramngawte chu ui tang ang maiin kan chhuah a. Kan ngaihthah kum zat kan vei pui leh chuan a let tam takin kan khawvel inkhaidiat a hi kan siam tha leh ang a, kan ramngawte paw’n a lo mawipui leh dawn a ni.
Lo hal hun kan hmachhawn leh turah pawh kan ramngawte tikang tlem ber turin, tu te paw’n fimkhur takin mei kawng tha tak sialin lo hal ila. Meipui chhuah lo turin tan i la theuh ang u. Hei lo hi ramngaw kan nei si lo a.