Ohio, USA-a Chihuahua ui, a neitu ten Spike tia a hming an phuah chuan nikum December thla khan kum 23 a tling a, Guinness World Record chuan khawvela ui upa berah an puang. A hmaa ui upa ber record siamtu chu fox terrier ui, Pebbles an tih mai a ni a, nikum October khan a thi a, a thih hian kum 22 leh thla 7 a ni hman.
-- Advertisement --
Spike hi a neitu, Rita Kimball chuan ui chuangtlai a vulh tak mai niin a sawi a, chiseh lama dawr a kalnaah kawng sira ui lo awm chuan a zui ta tlat a, ui chuang a ni tih an hriat hnuah an vulh zui ta a ni.
Kimball-i ten chhungkuain he ui an vulh tan hian kum 10 vel a ni tawh a, an chhar tirh chuan a ngawngah chain emaw hrui emawa an thlunna ni ngei tur a pilh deuh hrup nghe nghe niin an sawi a, an dawr kalna neitu chuan chu ui chu chulai velah chuan ni 3 lai a awm tawh thu a hrilh a, “Tu ui nge kan hre bik lo,” a ti a, Kimball-i te chhungkua chuan haw puiin, a hmingah Spike an phuah ta a ni.
Ui hi an than chak dan leh puitlin chak dan atanga chhutin an kum hi mihring kum nen a inthlau hle a, American Veterinary Medical Association chuan kan kum chhiar kum khat hi ui tan chuan kum 15 ang vel a ni a, chumi hnua kum khat lo awm chu ui tan kum 9 a ni leh a, chuti a nih chuan kan kum chhiara kum hnih hi ui tan chuan kum 24 a ni der tawh a, chumi hnuah chuan kum 1 lo awm zel chu ui tana kum 4 ang zel a ni tawh.
Hetianga chhut chuan kum 23 chu ui than chak dan leh puitlin chak dana chhut chuan mihring kum 108 nena inang vel a n