China tui khuah tum India tan ‘water bomb’ nih hlau

China tui khuah tum India tan ‘water bomb’ nih hlau
China-in khawvela tuikhuah lian ber siam a tum tih a puan chu a tui luanna thlanga awm, India hmarchhak leh Bangladesh tan ‘water bomb’ ang mai a ni thei dawn tih Arunachal Pradesh-a BJP Lok Sabha MP Tapir Gao chuan Thawhlehni khan a sawi.
Arunachal Pradesh MP hian ‘Ensuring Water Security, ecological integrity and Disaster Resilience in the Sub-Himalayan Region: The Case of the Brahmaputra’ tiin thuthar lakhawmtute a kawm.
“China-in electricity 60,000 MW siam theihna tur tuikhuah siam a tum a. He thil hi tuikhuah satliah a ni ngawt dawn lo va, India leh a hnuai lam luipui hrula awmte tan chuan water bomb atan a hmang thei dawn a ni,” a ti.
Gao-a hian June, 2000-a tui lian, Siang-a lei 10 zet tichhetu ang kha a ni thei dawn tih a sawi a. Siang hi Arunachal Pradesh-ah chuan Yarlung Tsangpo tiin Assam a luan luh hnuah Brahmaputra tih leh a ni.
“Nakinah China hian a tuikhuah hi a sah chuan Arunachal Pradesh, Assam, Bangladesh leh Asia chhimchhak ramte hi a tichhe vek thei dawn a ni,” a ti.
Arunachal East MP hian an state-a Siang khuah tumna awm chu tha a tih thu leh hei hian nakinah China tuikhuah sah a nih pawha a thlang lam zela tui lian tur vengtu a ni thei dawn tih as awi.
Gao-a hian China-in tui a khuah tur hian Tibet atanga lui luang pawh a tibuai thei dawn niin a sawi a. Sabereka khuangkaih emaw, lui tui tlem lutuk emaw a thlen thei dawn niin a sawi.
“Hei hian India-ah, a bikin Arunachal Pradesh leh Assam bakah Bangladesh thlengin, lo neih leh tui indaih lohna thlengin a thlen thei dawn a ni,” a ti.
India sorkar chuan China biain heng harsatna leh buaina awm thei hi chin fel theih a n tih MP chuan a sawi bawk.
China hian December 25 khan Yarlung Tsangpo, Tibet-ah khawvela tuikhuah lian ber tur, US $ tluklehdingawn 137 senna tur siamna tur hi a pawm tawh.
Tui hi luiin Arunachal Pradesh a luh hma, China-a Medog County-a lui luan kualna lai taka siam a tum.