Ukraine-in US siam Patriot air defence system dawn belh

Ukraine-in US siam Patriot air defence system dawn belh
President Volodymyr Zelenskyy-a chuan Ukraine-in Russian beihna lo do let nana hman turin US siam Patriot air defence system a dawn belh tih a sawi.
Patriot system-te hi kum li dawn kal taa Russia-in Ukraine an rûn atanga mi sang tel missile hmanga an thahna thin lo beih letna atana hman tangkai tak a ni.
Zelenskyy-a hian khawthlang rama an thawhpuite chu hetiang hmanrua hi pek belh turin a lo dil tawh thin a; mahse, siam chhuah tam a nih loh avang leh mamawh tawk zel chauhva pek an nih thin avangin an dawng zung zung thei lo.
“Ukraine-ah Patriot tam zawk aawm ta a, hna a thawk tan mek tawh,” tiin Zelenskyy-a hian Pathianni zan tlai tawh takah khan social media-ah a tar lang a. “Hmun pawimawh bikte ven nan leh kan ram puma kan khawpuite ven nan tam zawk pawh kan mamawh hle a ni,” a ti.
NATO chuan Ukraine hi hmanraw liante a pe reng a, European an thawhpui leh Canada pawhin US atanga lei belhin sipai hmanraw tam zawk bakah awmze neia thawk thei ralthuam inchhek nan an ti.
Hetih lai hian Donald Trump-a kaihhruai US sorkar erawh chuan a thlak tak, Joe Biden-a angin a pui nasa ve lo thung.
Hetih lai hian Pathianni zan tlai tawh takah khan Russia-in drone hmanga an beihnaah Ukraine hmarchhaka Sumy region-ah mipa pakhat thiin naupang pahnih telin chhungte dang pangain hliam an tuar a. Sumy-ah tho hian hmeichhe pahnihin hliam an tuar bawk.
Thawhtanni tuk thleng khan Russia hian missile chi hrang hrang 12 leh drone leh hmanraw dang hmangin vawi 138 a kap tih Ukrainian air force-in a sawi.
“Russian-te hian mipui an tum a, rawng taka chein an muttui lai an tum a ni,” tiin region head Oleh Hryhorov-a chuan Telegram-ah a tar lang.
Russian missile-te hian ram lailia Dnipro region an bei hmasa ber a, mipa pakhatin hliam a tuar niin region head Vladyslav Haivanenko chuan a sawi.
Russia hian thlasik laia intihlumna leh tui mamawh laiin Ukraine-a energy pekna pawh a kap a, Ukraine-in drone leh missile thar siam chhuahna pawh a buai phah.
Drone-in chhim lama Mykolaiv region a fuh bawk.
Hetih lai hian Pathianni zan tho khan Ukrainian sipaiten Russia-a Saratov oil refinery kap fuhin a kang niin Ukrainian Armed Forces General Staff-in a sawi a. Hei hi chawlhkar sarih dawn chhunga Saratov an beih vawi thumna a ni.
Tuialhthei thlitfimna hmun hi ramri atanga km 500 vela hla, kum tin metric tonne maktaduai tel siam chhuahna hmuh a ni.
Ukraine hian Russian-ten an luahsak, Luhansk-a sipai hmun pawh an kap fuh bawk.
Zelenskyy-a chuan kar hmasaa missile hmanga Russian tuialhthei thlitfimna an kah chhiahsak chuan Moscow-in a thlitfim thin 20% vel a tihtlem phah niin a sawi.
Russia chuan Thawhtanni khan an sipaiten Ukraine-a Pokrovsk khawpui, inkalpawhna leh awmna atana hman atana tha tak, an sipaiten kum khat chuang lak tuma an beih tawhah hma an sawn tih a puang.
Russian defence ministry chuan sipaite hian Pokrovsk rel station leh industrial zone bula Ukrainian sipaite an hneh a, khawpuia Prigorodny veng an luh theih phah niin a sawi.