District I&PR Office Champhai leh MJA Champhai District buatsaihin Champhai leh Khawzawla thuthar thehdarhtute chuan an huamchhunga ram leh khawtlang hmasawnna atana hnathawhte February 9 & 10 chhung khan an enfiah.
-- Advertisement --
National Highway 6 kawngpui siam hna, package li thawh bakah Vankal Solar Park Project an tlawh a. Hmasawnna ruhrel thawktute chu hna tlo leh tha, nakin zela chhawr tangkai theih thawk tura an beisei thu hrilhin, pawimawh leh tul an tihte an thlen a, harsatna an neih leh puih an ngaihna zawnah an inhawn reng thu an hrilh.
Shri Balaji Construction Company hian NH 06 Dulte to Champhai huamchhung package-III, Khawzawl leh Champhai inkar km 26.78 a thui, cheng vaibelchhe 370.43 senna tur an siam mek a, a then laiah lei laih hna thawkin, km.5 vel black topping zawh tawh a ni. Kumin February 9 thleng khan physical progress zaa 67.93 a ni a, financial progress zaa 63.03 vel a ni. Package-III hnuaiah hian lei pathum dawhin, hna zaa 80-90 vel zawh a ni a, culvert 148 siam turah 125 zawh tawh a ni. October 2021 khan hna an thawk tan.
NH 6 Dulte to Champhai huamchhung, package-II, Tuichang atanga Kawlkulh lam kim.1 vel atanga Khawzawl inkar hi Anusha Projects Pvt Ltd-in thawkin, km. 12.45 a thui, cheng vaibelchhe 121 senna tur a ni a, a then laiah lei laih hna thawkin, km.5 vel black topping tawh a ni. February 9 thlengin physical progress 61%, financial progress 57.5% vel a ni. Package-II hnuaiah hian culvert 78 siam turah 60 zawh tawh a ni. December 2021 khan hna an tan a ni.
Dhariwal Builtech Ltd hian NH 06 Dulte to Champhai huamchhung package-I, Dulte Junction to Tuichang inkar km 17.95 a thui, cheng vaibelchhe 212.36 senna tur an siam a, a thenah lei laih hna thawkin, km.6 vel black topping tawh a ni. February 9 thlengin physical progress 76.4 %, financial progress 72.08% vel a ni. Package-I hnuaiah hian lei dawh tur pahnih, culvert 66 siam turah 60 zawh tawh a ni. June 2021 khan hna an tan.
NH 06 Seling to Dulte huamchhung, package-IV, Tuivawl kam Saitual district chin km.4 vel atanga Dulte inkar hi Anusha Projects Pvt Ltd chuan thawkin, km 17.16 a thui, cheng vaibelchhe 185.49 senna tur a ni a; forest clearance avanga khaihlak laiah hmalak a la ngai a, km.15 vel black topping zawh tawh a ni. February 9 thlengin physical progress 91%, financial progress 89% vel a ni. Package-II hnuaiah hian culvert 90 siam a ni a, October 2020 khan hna tan a ni.
Hmarchhaka solar park project lian ber cheng vbch.150 vel senga mega watt 20 pe chhuak thei tur, Vankal Solar Park, Jawahar Lal Nehru National Solar Mission hnuaia thawh mek pawh an tlawh a. Khawzawl district bawrhsap CC Lalchhuangkima an kawm bawk.
Vankal Solar Park bun tur hian kum 2018 atanga bul tan niin, P&E department chuan power dawng thei turin 132/33 kV Sub-Station a peihfel tawh a. A bun hna hi Solar Developer 2: M/s Sunfree Northeast Renewable Energy Pvt. Ltd. leh M/s ATA Renewable P4 Pvt. Ltd. ten kum 2020 atang khan an thawk tan a. M/s Sunfree Northeast Renewable Energy Pvt. Ltd. hian power Mw 15 siamna tur buaipuiin M/s ATA Renewable P4 Pvt. Ltd. hian Mw 5 siamna tur an buaipui thung. Solar plate/ module hi a vaiin 35500 vel bun tur niin, tun thla chhunga zawh hman an inbeisei. Solar plate hi tin 125 hmunah bun a ni a, inverter control room 7 siam niin, project pumpui hian tin 140 hmun vel a awh a ni.
Vankal Solar Park hi hrilen laia hna a khaihlak avangin a zawh hun tura ruahmanah zawh a ni lo a, tun thla chhunga zawh beisei a ni. Company-te chhut dan chuan, kum khata nisat that zual bik thla 4 vel chu full capacity-a pek chhuah theih beisei a ni a, thla 8 dangah chuan chawhruala Mw 8 vel thlenga siam chhuak thei tura beisei a ni. Hemi atanga power siam chhuah hi Mizoram sawrkarin man tlawm zawk Rs 3.94/unit velin a lei thei dawn a ni. Vankal Solar Park-ah hian tunah power lakluh leh pekchhuahna tur 132/33 kV Sub-Station leh Control Room zawhfel tawh niin, Saitual lam atanga 132 kV line lokal pawh 132/33 kV Sub-Station kaltlang tir a ni tawh.