un season kal lai tawp ruala chawlh tum ve tawh Joaquin

Tun season kal lai tawp ruala chawlh tum ve tawh Joaquin
Spain leh Real Betis legend Joaquin chuan tun season tawp rual hian a boot khai hul ve tawh a tum thu a nemnghet.
Betis thuam inbel chunga Copa del Rey trophy pahnih hawn tawh Spaniard winger hi tunah kum 41 mi ni ve tawhin, goalkeeper pawh ni lo outfield player zingah chuan professional ni rei thei pawl tak a ni a; tunah hian academy-a a zirchhuahna Betis-ah a vawihnihna atan hun a hmang leh mek a ni.
Kum 2000 khan he club academy atang hian ei tling turin a chhuak a, kum 2005-ah Real Betis chu a hmasa zawk atan Copa del Rey-ah champion-puiin, a hnuah Valencia, Malaga leh Fiorentina tan a khel zui ta a, kum 2015 a herchhuah meuh chuan a hmangaih hmasa Betis-ah bawk kirlehin, he club behchhan chung hian a chawl ve dawn ta nghe nghe a ni.
Joaquin chuan, “Ka hun a thleng ve ta tih hi sawi ka duh a, tun hi Real Betis player ni chunga ka season hnuhnungber a ni ve dawn ta a, mahse, he club nena kan inthenna tur erawh a ni dawn lo. Kan intawng leh thuai dawn nia aw tihna ang chauh a ni ang, a chhan pawh Real Betis hi ka nun nena inzawm tlat a ni, hringnunah kawng dang zawh mah ila he team laka ka rilru puthmang a ngai reng dawn a, he team behchhana ka hun hman tawhte kha ka hlimpui reng tawh dawn a ni,” a ti.
Nikum khan Joaquin hian captain banhren hreng chungin a tumhnihna atan Betis chu Copa del Rey title a lakpui a, final penalty petah Valencia an hneh.
A career-ah Real Betis tan game 521 khelin goal 68 a thun tling tawh.
Season kal laiah league game kua khelh hmabak la nei chungin La Liga game khel tam ber Andoni Zubizarreta record (622) khum turin Joaquin hian ‘chance’ a la nei a, tun dinhmunah record ding lai khum turin game sarih chauh a mamawh tawh.