UN Secretary-General in Myanmar buaina ngaimawh

United Nations Secretary-General Antonio Guterres chuan Myanmar buaina chu an ngaihven takzet thu a sawi a.
UN chuan Myamar tualchhung indon avanga ram chhunga chenna in leh lo chhuahsana talbuai maktaduai hnih an chuang tawh tia sawiin humanitarian aid a luh theih nana remtihna pe turin a ngen bawk a.
China leh Myanmar inrina Shan State-a ethnic armed group pathum intelkhawmte chuan Myanmar sipai leh police-te chu an um chhuah zel avangin chu chuan Myanmar-a opposition force te a tiphur hle a ni.
Shan State chhim lam Thailand nena inrina Kayah State-ah chuan ethnic Karenni insurgent te chuan khaw lian ber Loikaw la tawhin university pawh an thuhnuaiah an dah tawh a.
Local activists ten an din Volunteer people’s defence forces (PDFs) te chuan Shan State a sipai te hnungtawlhna chu remchangah hmangin chet an la bawk a.
PDF te hi ethnic army dangte anga tawnhriat nei tha leh ralthuam pawh nei tha an ni lo zawk chungin hma an sawn chak hle thung.
Sagaing-ah pawh PDF te chuan sipaite an bei nasa hle a, tun hnai lawkah pawh Kawlin khua an thuhnuaiah dahin Irrawaddy River kal pawhna khaw pawimawh tak Tigyaing pawh lak tumin an bei mek bawk a. PDF te hi Myanmar a khawpui lian ber dawttu Mandalay chhehvelah pawh an che na hle tia sawi a ni bawk.
Junta te chuan chhim lama India nena inrina lai an hloh deuh vek tawh tih a ni bawk a. Ethnic Chin insurgent te chuan tun hnai lawkah ramri hnaiha Rihkhawdar pawh an la tawh bawk.
Chhim lamah Arakan Army te ethnic insurgent group zinga ralthuam nei tha ber te chuan inkahhaina titawpin Myanmar army leh police-te an bei tan bawk a.
Ethnic force lian tak dang Karen National Union te chuan chhim chhak lamah military post te beiin hengte hi Thai border hnaiha hmun pawimawhte a ni bawk.
Heng armed group te chhut chhiat nan hian Myanmar sipai sorkar chuan Russian leh Chinese siam indo thlawhnate a hmang nasa hle a, chung mai bakah helicopter leh heavy weapons heng rocket launcher ang te pawh a hmang bawk a. Mahse, Myanmar hmun tin maia helna chhuak chuan Myanmar sipai te a tichak lo nasa hle tawh a ni.
Myanmar air force chuan transport helicopter 40 vel chauh a nei a, a vaiin service thei vek an ni lo bawk a. Buaina hmun hrang hranga sipai phur kual zung zung thei tur a ni lo bawk.
Army-te an chau hle tia sawi ni bawkah hei vang hian an unit tam tak te chu hel pawl te kutah inkahna pawh a awm hmain an inpe tia sawi a ni bawk a.
Shan State-ah ngat phei chuan hel pawl tena army hmunpuite an lak hnu kar thum a liam hnuah pawh Myanmar sipaite chuan beih let pawh an la bei let thei lo hial a ni.
Mahse Myanmar sipaite chu an chhe vek nghal dawn tihna a ni lo va. Combat unit turu tak Light Infantry Divisions tih te chu a la nei a, hengte hi che rapthlak thei ta niin mangan tawpah chuan Myanmar-in a neih that ber tur te an la ni.