ASEAN ram ten Gaza indona tawp se duh

Southeast Asian Defence Minister inhmukhawmte chuan Israel-Hamas indona chu tawp se an duh thu sawiin Gaza-ah khawvelin humanitarian aid corridor a siam a ngai an ti bawk a, mahse, Myanmar buaina chungchangah erawh sawi an nei lo.
Jakarta-a Defence Ministers of the Association of Southeast Asia Nations (ASEAN) meeting chuan South China Sea-a freedom of navigation leh overflight pawimawhna pawh sawiin heng tuipui hmunah te hian international rules lekkawha zah turin an ti bawk.
Ram 10 awmna ASEAN ah hian Myanmar pawh a tel a, mahse tharumthawhna thleng mek tihziaawm a nih theih nana five-point peace plan siam an kalpui theih loh avangin Myanmar defence minister chu meeting naah a tel ve remtih a ni lo thung.
“Myanmar dinhmun chhe zel pawi kan ti a ni” tiin Indonesia Defence Minister Prabowo Subianto chuan a sawi a. “Indonesia chuan ASEAN member dangte pawh Myanmar-in tun harsatna a tawh mek ata remna a neih theih nana pui turin kan ngen a ni,” tiin a sawi.
ASEAN chuan kum 2021 khan Myanmar top general te nen ruahmanna siam tumin hma an la tawh a, tharumthawhna ti tawh a, special enovy hmanga inbiakna nei a, mipuite hnena tanpuina leh chhawmdawlna pek turin ruahmanna a siam a. Mahse, Myanmar sipai sorkar chuan ruahmanna a bawhzui duh lo a ni.
Joint declaration siam chuan South China Sea a China nena tuipui ram inchuh pawh chinfel a nih theih nan chak zawka hmalak ni se an ti bawk a.
Defence Ministers te chuan he mi chungchang bikah hian tuipui ram inchuhnaa inhnamhnawih ram dang te nen inbiakna an nei zui dawn bawk.
Subianto chuan a thu sawiah Israel-Hamas buaina pawh sawiin, “Indonesia chuan Gaza a buaina chu pawi a ti takzet a, a bik takin mihring te tawrhna nasa tak chu a pawi a ti takzet,” tia sawiin civilian-te laka tharumthawhna chu tihtawp a ni ngei tur a ni tiin a sawi bawk a. Mahse, thuchhuah intawm erawh an siam lo thung a ni.
ASEAN member pathum Indonesia, Malaysia leh brunei te chu Muslim-majority ram an ni a, heng hmunah te hi chuan sakhuana chuan tualchhung politics thuk takin a thunun a, tun hma atang tawha Palestinians te thlawp niin an pathumin Israel nena diplomatic lama inzawmna nei lo theuh an ni bawk.
Malaysia Defence Minister Mohammad Hasan chuan Gaza-a civilian, chenna in leh damdawi in beih te chu a dem thu sawiin pawisawi lo naupang, hmeichhia leh mipate tihhlumin an awm, a ti bawk a.
Singapore thung chuan Hamas te na taka dem thungin October 7-a Israel an beihna chu a dem thu sawiin indona bultantu a ti bawk a. Singapore hi chuan Israel nen inzawmna an nei tha em em thung a ni.
“Asia tana zirlai awm chu peace leh security hi hloh theih a ni,” tiin Ng Eng Hen, Singapore’s Defence Minister chuan a sawi a.
“Tunah chuan thlamuang takin security tha kan nei a ni thei a. Mahse, kan hruaitu tena an ngaihsak reng loh chuan kan hloh ve thei a ni,” tiin Ng chuan a sawi.