Union Home minister-in MNF a sawrkar leh ngei min duhpui – Zoramthanga
Union Home minister-in MNF
a sawrkar leh ngei min duhpui
– Zoramthanga
MNF sawrkar laiin ‘issue’ hrang hrang vangin centre-a BJP kaihhruai sawrkar nen an inkar a tha loa, ZPM lam an awn san hnu ah, Union Home minister chuan MNF sawrkar leh ngei se a duhpui hle niin MNF hruaitu Zoramthanga chuan a sawi.
Thawhtannia Mizo Hnam Run inkhawmah MNF president Zoramthanga hian, kumin March 15-a Mizorama a lokal khan Home ministry official-te ruahman puinain Union Home minister Amit Shah nen an inkawm tih a sawi a. ZPM sawrkar ka hmuh dan a zawt ngun viau a. An sawrkar a la tharlam a, nakinah thil an zir zel anga, an la hre chhawm ve mai ang, ti baka a chhan loh thu a sawi.
MNF sawrkar liam taah khan ramri/Vairengte issue bakah central BJP sawrkar nena an inlaichinna a tha tawk lo hle a, BJP hian ZPM an awn ta niin a sawi.
“Tuna Pu Duhoma sawrkarah hian BJP-in tel ve an inbeisei a, a hnuah MP inthlana ZPM chak kha, khatih laia BJP-in central-a sawrkar siam tura MP 272 an mamawh lai tak a ni a. Mizoram Lok Sabha MP pakhat chauh pawh a pawimawh em em lai a ni. Khati chunga BJP tan an pe thei lo kha an boruak a tha ta lo takzet a ni,” Zoramthanga hian a ti.
Amit Shah hian MNF sawrkar leh ngei se a duhsak a, grassroot atanga tan la nasa turin ti tak zatin a fuih niin a sawi.
Union HM nen an inkawm chhan ber chu, central-a Congress sawrkar lai, Burma rama remna a awm theihna tura palai hna a thawh dan a zawt tih a sawi. “Burma underground intelkhawmin federal state siam an duh a, a lehlamah Burma sipai sawrkar pawhin federal sawrkar siam a remti a. Rangoon, Bangkok-ah vawi tam ka kal hnuah India sawrkarah ka report a, anni’n National Security advisor Ajit Doval nen min tir ta a, kan hlawhtling teuh hle tih thu ka hrilh,” a ti.
India rama exposure nei tura phur taka ruahmanna an siam laiin, Burma inthlanah Aung San Suu Kyi a sawrkar a, hmalakna a tawp zui ta tih MNF president hian sawiin, tunah chuan sipai sawrkar hnuaiah thil a khirh ta hle tih Amit Shah hi a hrilh thu a sawi bawk. “Exposure neih an duh dan leh India sawrkarin hmachhawpa a lo neih tawh kha ka sawi a. Hei hi Union HM hian a ngai thutak hle,” a ti.