Union MoS-in Hnahthial a tlawh

Union MoS-in Hnahthial a tlawh
Union minister of state for Minority Affairs, Fisheries, Animal Husbandry & Dairying George Kurian chuan Inrinni khan Hnahthial district a tlawh a. District-a office hotute kawmin, an district chhunga central scheme hmanga hmalakna awmte a tlawhkual.
Hnahthial district office hotute nen an inkawmnaah Union MoS hian zawhna a neihte an chhang a. Department hrang hrang hnen atangin Hnahthial district-a sawrkar laipui scheme, a bikin Pradhan Mantri Awas Yojana (PMAY), Jal Jeevan Mission (JJM), Mid-day Meal, Kisan Credit Card (KCC), Ayushman Bharat leh Agriculture leh Fisheries ministry hnuaia scheme hrang hrang kalpui dan zawt chiangin sawiho zui a ni.
Central scheme kalpuina kawnga tithuanawpthei thil bakah hma an lak zelna atana an mamawh chu George Kurian hian ngaihthlak sakin, infrastructure lamah hospital leh college mamawh a zawt. Government Hnahthial College-ah Arts stream chiah a awm chu pawi a tih thu sawiin, Science stream hawn theih nan central atangin funding a awm thei tih a sawi. Department hrang hrang chuan an mamawhna theuh thlenin, an harsatna leh mamawh chu a chhinchhiah a, a theih anga hma lak sak a tum tih a sawi a ni.
Official-te nen an inkawm zawh hnuin Union minister of state hian Anganwadi -cum- Crèche tlawhin a hmunhma a enfiah a. AH & Vety building a tlawhnaah department hotuten hospital laboratory an mamawhna a ngaihthlak sak a, an mamawh chu chipchiar zawka thlen turin a ti.
Hnahthial District Hospital hmunhma a enfiahnaah hospital-in pathologist bakah an mamawh dang an lo hrilh a. Hemi zawh hian Leite-a JJM hnuaia Solar Pump House sak a tlawh a, solar pump hmanga in 198 an chawm thei chu lawmawm a tih thu leh JJM an kalpui dan hrim hrim chu fakawm a tih thu a sawi. Solar pump-a en zawh hian in sak tanpuina, Pradhan Mantri Awas Yojana – Urban hnuaia sak K Lalchhuanawma, Lunleng Veng in chu a endik a ni.
Union MoS hian Lengpui Airport atangin helicopter-in Hnahthial hi a pan a, district bawrhsap Rita Lalnunmawii Pachuau leh district hotu dangten an lo dawngsawng. Hnahthialah zan riakin Pathianni khan helicopter hmang bawkin Lengpui Airport panin Delhi-ah a haw. Hnahthiala a cham chhung hian stall exhibition hrang hrang – Agriculture, Sericulture, AH&Vety, ICDS, Horticulture, Fisheries bakah MHIP, MzSRLM leh a dangten an phochhuah chu a en a ni.