Union MoS-in school tlawh

Union MoS-in school tlawh
Mizoram tlawha rawn kal, Union minister of state for Education Jayant Chaudhary-te nupa chuan Nilaini Chanmari Aizawla PM Shri Govt Model English Primary School an tlawh.
Union minister hi classroom-ah lutkualin naupangte a kawm a. Classroom-ah hian naupang thenkhat bulah thuin an school chanchin a zawt a ni. Zirtirtute pawh an thawh dan thenkhat a zawt bawk. Ei siamna hmun a fang a, chaw chhumtute nen inkawmin an eisiam dan a zawt a, an thawk tha nia a hriat thu a sawi a ni.
PM Shri Govt Model English P/S a tlawh hnu hian Mizoram State Museum Zarkawt a tlawh nghal a. Mizo nunphung leh khawsak dan hriat theihnana thil pawimawh hrang hrang vawn that enkualin, hlu a tih thu a sawi.
Zan hnih riaka rawn zin Union minister-te nupa hian school leh museum an tlawh hnuah Nilaini chawhnu khan Lengpui Airport atangin New Delhi an pan a ni.
School leh museum an tlawhnaah hian School Education minister Dr Vanlalthlana bakah School Education hotute an tawiawm a. State Museum-ah hian department leh Museum hotuten an lo dawngsawng a ni.