Union MoS-in winery tlawh

Mizoram tlawhtu Union Minister of State for Agriculture & Farmers’ Welfare Shobha Karandlaje chuan Thawhlehni khan zankhat riak turin Champhai a thleng a. Winery, leilet zawl leh hmundang thenkhat a tlawh.
Champhai Grape Growers Society enkawl Champhai Winery Tlangsam tlawhin grape sawr bultan a hmanpui a. Sawrkar laipuiin food processing industry a ngaihpawimawh thu sawiin, Champhai leh Hnahlan Grape Winery hruaitute thil thlen chu a tul anga lo ngaihven zui a tum thu a hrilh a ni.
Champhai leilet zawl a tlawhnaah farmer interest group (FIG) member-te a kawm a. Leilet enkawltute chuan Champhai leileta kumtluana buh leh thlai dangte chin a nih theihna’n tui hnianghnar zawk nei turin water harvesting dam siam te, Tuipui lui lian avanga harsatna hrang hrang awm thei leh a venna tur siam chungchang leh leitha duh khawp hman tur a awm theihna’n hma lakpui turin an lo ngen. Union MoS chuan loneitute thawhrimna chhuanawm a tih thu sawiin, an tana sawrkar laipuiin hamthatna a duan an chhawr tangkai dan a zawtfiah a. Line department official-te chu leilet neitute harsatna hrerenga DPR siama sawrkar laipuia thehlut turin a hrilh.
He huna tarlan a nih danin PM KISAN Scheme hnuaiah Champhai district atangin kumin July 3 thleng khan inziaklut 11416 awmin 10585 ten hamthatna an dawng tawh a ni.
Pradhan Mantri Matsya Sampada Yojana kaltlanga cheng nuai 15 senga sangha chi tharchhuahna, Tlangsam ami tlawhin sangha note tharchhuah leh a hmunhma a enfiah a ni.
Non Lapsable Central Pool of Resources, NLCPR (DoNER) sum cheng vaibelchhe 19.88 senga PHE department siam Keilungliah tuikhuah, kumin April 1-a Union Home minister-in a hawn chu a tlawh bawk a. Keilungliah tuikhuah enkawl tura sawrkarin a din Committee hmalakna hrilhfiah a ni a. A enkawl zui, cheimawi leh Champhai tana tui mamawhna phuhruk a nih theih na’na project siamte hrilhfiah a ni bawk.