United-ah Antony la kir thei lo

Pathianni khan Manchester United chuan thuchhuah siamin, hmeichhe laka tharum thawh thubuai nei an striker Antony chu club-ah a la kir thei lawk dawn lo a, chawlh a la chhunzawm rih dawn tih an tarlang.
Club thuchhuah chuan an club-in Brazil striker laka puhna awm an hriatpui thu leh international break laia ram tana inkhel ve lote Thawhtannia training tura an kir thu sawi chungin Antony erawh club lama a kir loh an remti.
Antony hi a bialnu hlui Gabriela Cavallin chuan a laka tharum thawhah puhin, police lamin thil awmdan an chhui mek a, amah chuan tihsual a neih loh thu sawi mah se investigation kalpui a nih miau avangin World Cup qualifying match hnih khel tur Brazil squad atangin a inhnuhdawh phah.
Brazil leh Greater Man-chester Police chuan United player laka puhna awmte hi a hrang ve vein an chhui a; kutthlaka puhtu hi pakhat chauh ni loin hmeichhe pahnih an ni a, tun thleng hi chuan thubuai awrhtir a la ni lo a, man pawh a la tawk lo.
Antony tel lo Brazil chuan karliamta Zirtawpni khan 2026 World Cup qualifying campaign bul tanin, Bolivia laka 5-1 hnehna an chang a, zanin hian Peru an hmachhawn leh ang.
Antony club United hi Premier League table-ah 11-na ni mekin, game li khelhah point ruk chiah an hmuchhuak a, Inrinniah Brighton an mikhual ang.