United ah Luke Shaw a rinawm

England defender Luke Shaw chuan Manchester United ah rinawmna thu a tiam thar a, Old Trafford-ah kum li dang cham belh a, kum 2017 nipui thleng cham turin contract a ziak thar.
Manchester United leh England defender rintawl, kum 27 mi Luke Shaw hian kum 2014 khan Southampton atangin United hi a zawm a. Southampton tan vawi 60 lo khel tawh Shaw hi Red Devils player pawimawh a ni chho deuh ngar ngar. Inelna hrang hrangah Red Devils tan hian tun thlengin vawi 249 a khel tawh.
Manager lar Jose Mourinho-a’n United a enkawl lai khan duhsak a hlawh phak lo va, Shaw hian hun hreawm tak a hmang hman. Mourinho a chhuak a, Ole Gunnar Solskjaer-a’n United a enkawl hnuin Shaw hi player pawimawh a ni leh nghal thung. Solskjaer hnuaiah a vul thar leh hnuin United enkawl mektu Erik ten Hag hnuaiah a khel tha leh zual a, vawi 36 a khelh tawh atangin goal khat a thun a, assist vawi ruk a nei lai a nei tawh bawk.
United tan ropui taka a khelh hnuin kum 2014 atanga khan England tan a khel tan a. Three Lions tan hian vawi 29 khel tawhin goal thum a thun tawh. Euro 2020 final-ah Italy laka hmahruaina goal a thun kha ram tan goal a thun pawimawh ber pawl a ni.
Shaw hian kum 2027 thleng Old Trafford a cham turin contract thar a ziak leh ta a. Southampton atanga club lian United a zawm thei chu ropui a tih thin thu leh kum 10 chuang zet Old Trafford-ah a cham thei tur chu ropui a tih thu a sawi.