Tottenham in United lehpel

April 3, Thawhtan zana EPL inkhel awmchhunah Everton leh an mikhual Tottenham Hotspurs te chu 1-1 in an inhnehtawk. Goodison Park-ah hnehna chang zo bik lo mah se Tottenham hian an chunga awm Manchester United an lehpel a, palinaah an inhlangkai tho thung.
Goodison Park-a inhmachhawn Everton leh Tottenham te hian chak an mamawh dun viau. Mualneitu Everton hian tlakhniam pumpelh an tumna kawngah chak an mamawh a, team lian Tottenham lakah an chak thei a nih chuan him turin an dinhmun a tha leh zual sauh dawn. Toffees in him tura chak an mamawh em em laiin Tottenham hian Manchester United leh Newcastle United te lehpel a, pathumnaa kir turin point thum an mamawh ve bawk. Team hnihte tan inkhel pawimawh tak a nih vangin inkhel pawh a hmuhnawm viau a, goal hnih leh red card pahnih hmuh tur a awm.
Inkhel pawimawh takah Everton in bul an tan tha a, inkhel tan atanga minute hnihna lekah an khingpuite nawr tlangin, goal thun theihna hun tha an nei a, uiawm takin an hun tha an hlah thung. Toffees hian an khingpuite nawr tlang bawk thin mahse an forward pawimawh Dominic Calvert-Lewin awm lo an tuar a, a tawp khar tha thei lo. Innawr tawk tak chungin chawlhlawk hmain goal thun thei an awm lo.
Chawlhlawk hnu lamah inkhel a hmuhnawm lehzual a, goal hnih leh red card pahnih hmuh tur a awm. Minute 58-naah Harry Kane leh Everton midfielder Abdoulaye Doucoure te chu mual laiah an innawr deuh nak nak a. Abdoulaye Doucoure hian Kane hmaiah tak a nem siah vangin hnawhchhuah a ni. Kane hi hun rei tak chhung enkawl a ni a, enkawl a nih chhung zawn hian a tider-ah ngaiin Everton bench a thute an lawm lo viau thung. Chak mamawh tak chunga tlem zawk an nih vangin Everton dinhmun a chhe leh zual a, goal an chhuah zui ta reng bawk.
Minute 68-naah defender khel tha tak Michael Keane-a’n Cristian Romero a tihtluk vangin penalty a chawi. He penalty hi Tottenham tana goal thun hnem ber Harry Kane chuan si nghak Jordan Pickford rin loh lamah chiang zetin a pet goal a, hmahruaina goal a thun.
Tam zawk ni chunga hma an hruai vangin Tottenham dinhmun a tha viau a, point thum hmuin, pathumnaah inhlangkai ngei tura ngaih an ni hman. Chak theihna hun nei tha viau mah se hun tawp dawnah Everton nawr let an tuar lo thung. Goal thun belh a, an hmahruaina tihzau belh an tum laiin minute 88 naah Tottenham midfierl Lucas Moura chu hlauhawm taka a chet vangin hnawhchhuah a ni. Bench atanga lut Moura hnawhchhuah a ni hian Everton a fuih phur thar a, An si phurh sut ngei tumin tan an khawh zui nghal chat bawk.
Lucas Moura hnawhchhuah a nih hnu lawk Everton defender Michael Keane chu ropui takin a inlan. Penalty chawitu Keane hian minute 90-naah yard 25 zet a hla atangin goal ropui a thun a, goal ropui hmangin an si phurh a sut. He goal ropui hian chak ngei tawh tura inngai Tottenham a barakhaih chiang hle. 1-1 a nih hnuin goal dang a luh belh tawh lova, inkhel hmuhnawm tak chu chak zawk awm lovin an tin zui ta a ni.
An hmahruaina hum zo lovin, point thum hmu zo bik lo mahse Tottenham hian an chunga awm Manchester United an lehpel a, top 4 huangah an kir ta tho. Spurs hian khelh 29 atanga point 50 hmuin palinaah an kaisang a. Top 4 huang luah phak tuma an elpui lian Manchester United leh Newcastle United te nen point 50 theuh an hmu a. Tottenham hian Newcastle leh United te aiin vawi hnih ngawtin an khel tam zawk mek thung.
Palinaah awm rih mah se Tottenham dinhmun a him lo viau thung. Tottenham aia khel tlem Newcastle leh United te hian hnehna an chang a nih chuan Tottenham hi panganaah an tlahniam ang a, parukna Liverpool nen an inkar a zim viau thei dawn bawk. Manager nghet nei lo va awm mek Spurs tan hian champions league khelh phak theih a nih laiin Europa League pawh khel phak lo va tlak hniam theih a ni tho bawk a. Season tawp hma chu an tan mar reng a ngai ang.
Khingpui hautak Tottenham lakah point an hmuh vangin Everton in him theih beiseina an nei sang leh zual a, point 27 nen 15-naa awm mek an ni a, manager Sean Dyche hnuaiah kawng dik an zawh leh mek a ni.