United in semi-fina an lut

United in semi-fina an lut
Pathianni zan khan FA Cup quarter-final khelh chhunzawm a ni a, Manchester United, Brighton leh Sheffied United ten Manchester City hnung zuiin semi-final an lut.
FA Cup-ah vawi 12 champion tawh a, champion ngun ber dawttu Manchester United hian Old Traf-ford-ah Fulham an mikhual a. An mikhual lakah si an phurh hmasak zet hnuin 3-1 in an mikhualte an lehthal a, hnehna pawimawh an chang United hian Old Trafford-a an mikhual Fulham lakah an khel tha lova, goal chhuah hmasa zawkah an tang hial. Inkhel hmuhnawm takah hian chawlhlawk hmain goal lut a awm thei lo phawt a, minute 50-naah Aleksan-dar Mitrovic chuan Fulham hmahruai na goal a thun.
An mualah goal an chhuah vangin United in goal thun tumin tan an khawh thar a, inkhel boruak pawh a sang thar viau bawk. Minute 72-naah Fulham tan chhiat vek theihna tur vanduaina a thleng. An lama goal mai tur dan a tumna lamah Fulham winger Willian chuan a kutin ball a khawih fuh palh a, Willian hi hnawhchhuah a ni a, penalty a chawi tel bawk. Willian hnawhchhuah vanga lungawi lohna langsar taka lan tirtu Mitrovic hnawhchhuah a ni tel bawk a, Fulam hi pahnih ngawtin tlem zawk an ni nghal thawt.
Penalty hi Bruno Fernandes chuan awlsam takin a pet goal a, an si phurh a sut. 1-1 a nih hnuin pahnih ngawta tam zawk United in goal hnih an thun belh zui leh. Minute 77-naah Sabitzer chuan hma an hruai letna goal a thun a. Minute 90’+6-ah Bruno Fernandes chuan an goal thumna a thun zui leh bawk. 3-1 Fulham hnehtu United hian semi-final-ah si nga fai ngawta Grimsby Town sawptu Brighton an hmachhawn zui leh ang.
Semi-final lehlamah Manchester United hmachhawn turin Sheffield United chuan tum hnih hnufual zawka an tan hnuin Black Burn Rovers chu 3-2 in an lehthal.
FA Cup semi-final hi April ni 22 leh ni 23 zan khian khelmual ropui Wembley-ah khelh a ni ang