Upate enkawl turin inzir ho

Kum upate enkawl kawnga hriat tur tul, thla thum awh inzirtirna – Geriatric Caregiving Training chu Zirtawpni khan khar a ni.
Geriatric caregivers (kum upa enkawltute) training hi sawrkar laipui Ministry of Social Justice & Empowerment hnuaia scheme – Atal Vayo Abhyuday Yojana (AVYAY) atanga hman a ni a.Mizoram Social Welfare & Tribal Affairs chu nodal agency niin, RIPANS Aizawl chu training centre a ni.
Thla hnih chhung theory class neihpuiin, thla khat dan chu a takin an inzir a; hospital leh Geriatric home-ah an duty kual thin a ni. Course hi National Institute of Social Defence Ministry of Social Justice and Empowerment siam standard guidelines anga kalpui a ni.
Training kharna hmanpuitu Social Welfare & Tribal Affairs director Dr Lalhriatzuali Ralte chuan zirchhuak ta te chu an thiamnate chhungkua leh khawtlang bakah ram tan hmang turin a fuih a. Sum dah lal ber loa, Pathian rawngbawlna anga ngai chunga an thiamna chu kum upate enkawl nan hmang turin a fuih bawk.