Upaten duattu mamawh telh telh – Social Welfare minister

Upaten duattu mamawh telh telh
– Social Welfare minister
Kum upaten rilru leh taksa lamah zah, hmangaih leh duat taka enkawltu an mamawhna a zual telh telh thin a; Pathian zara kan dam zel chuan chu dinhmun chu kan la tawn vek tur a ni tih Social Welfare minister Lalrinpuii chuan a sawi.
Zirtawpnia Aizawla Senior Club Mizoram High Council vawi 3-na a hmanpuinaah Social Welfare minister chuan, Mizoramah kum lama upa zawkte pawl din, anmahni enkawl leh buaipui, pawl ropui tak Mizoram Upa Pawl kan nei a. Kawng hrang hrangin an tangkai em em a. Mipui zinga kum upa heti zat kan awm lai leh, hetianga kum lama upa zawkten pawl tha tak kan neih lai a, kum lama upate ngaihsak a, enkawl a, buaipui tur bik pawl Senior Club Mizoram a ding chu a lawmawm hle tih a sawi.
“Pathian zara kan dam a nih chuan, ‘tar’ dinhmun hi kan la luah vek dawn a. Kum upate hi an taksa a lo chak lo telh telh a, rilru leh taksa lamah zah, hmangaih leh duat taka enkawltu an mamawhna a zual telh telh thin. Kum a tam telh telh a, rilru erawh a naupang chhia telh telh thin, tih tawngkam hian kum a lo upat hnua upate harsatna tawh thin chu a tarlang chiang viau,” a ti. Chutihrualin, chhungkua azirin upate thlavang hauh a, thlamuang tak leh rilru hlim taka awm tir vek erawh a harsa viau in a rinawm tih a sawi a ni.
Social Welfare & Tribal Affairs department-in Old Age Home an nei a, chuta enkawl an neih dan atang leh, old age home hrang hranga awm an pun chhoh zel dan atangin, Sap ram angin enkawltu neilo kum upa an tam telh telh dawn nia a lan thu Lalrinpuii hian a sawi a. Sawrkarin theihtawpin upate ngaihsak a tum a, Old Age Home ho pawh tihchangtlun a, tihlen zel dan an ngaihtuah tih a sawi a ni.