India sorkarin Manipur-a Zo hnahthlakte leh Meitei-te chu March ni 8-a inkalpawh tan turin ti mah se an la inkalpawh lo a, sorkar lam atang pawhin tumna thawm a awm rih lo.
March ni 8 khan Manipur sorkarin sorkar laipui thu angin Zo hnahthlakte awmnaah lirthei tirh luh an tum a, Lamka-ah passenger nei lo Manipur State Transport bus pakhat a lut tih loh chu hmun dangah lirthei an lut lo. Chumi hnuah chuan lirthei an lut zui lo.
Hetia sorkar laipuiin inremna neihpui hmasa lo leh an thil ngiatte ngaihtuah lova inkalpawh tura a ti hi Zo hnahthlakte’n an hrethiam lo a, inbarh luih tumnaah an ngai. Hei vang hian an chenna hmuna lirthei lut tur pawh nasa takin an lo dang a, venhim hnathawkte nen nasa takin an innawr. Kangpokpi district-ah phei chuan pakhatin nunna a chan.
District hrang hranga Zo hnahthlakte’n bandh an huaihawt zui a, mahse lirthei tirh luh tumna a awm zui loh avangin bandh hi an titawp rih.
Manipur atanga thu dawn danin, an boruak sa thut kha a dai leh tawh a, tunah rih chuan inep emaw innawr emaw a awm lo.
Kuminah inkah a awm rih lovah ngaih a ni a, chutianga an awm lai chuan India sorkarin March ni 8-a inkalpawh tan turin a ti a ni. An buai tirh atangin Zo hnahthlakte leh Meitei hi an inkalpawh tawh lo.
‘Thil ngiat kan nei a, separate administration kan ngiat a, chu chu a pe theitu hnenah kan thlen a. Chumi lam ngaihtuah lova hetia inkalpawh tura min han ti hi a intham loh thlak kan ti a, keini chuan kan buaina chin fel a nih nan hian inbiaka kan thil ngiatte ngaihtuah phawt kan duh a ni,’ Zo hnahthlak lam chuan an ti.
Manipur hi President’s Rule-ah an awm mek a, hemi hnu hian sorkar laipui hnuaia awm venhim hnathawkte’n state pum hi an vil. An khauh a, Zo hnahthlakte leh Meitei inhnaihna hmun, a lehlam lehlamin duty post an neihnateah phei chuan an khauh hle tih thu dawn a ni.
Zofate leh Meitei la inkalpawh lo
Get real time updates directly on you device, subscribe now.