UPSC Coaching Programme-ah zirlai 100 a thlawnin zirtir mek
Mizoram Youth Commission (MYC) chuan Drishti IAS Coaching Institute nen tangduna an buatsaih ‘Free UPSC Coaching Programme’ chu Nilaini khan chief secretary Khilli Ram Meena chuan a hawng.
Chief secretary chuan, March 2025-a Union Home minister Amit Shah Mizorama a rawn kal khan, state harsatna tawh mek sawiho turin Mizoram-a civil society organisation nen an inkawm a. Chutah chuan Mizoram atanga IAS tling hnuhnung ber pawh kum 2014-a tling niin, Mizoram atanga All India leh Central Civil Services-a inziaktling an tlem hle tih sawi a ni a. He thu hi ngaipawimawhin state official-te chuan Free UPSC Coaching Programme hi an duang a, India rama coaching institute hlun leh changtlung berte zing ami Drishti IAS New Delhi hi thlan a ni tih a sawi a. Coaching-a kal tur zirlaite a fuih bawk.
MYC chairman Malsawmzuala Ralte pawhin, Mizoram-ah Central Civil Services exam-a hlawhtlinna thlen tumin sawrkar, kohhran leh khawtlang miten an theih ang angin thawk mah se, hlawhtlinna chu mimal tumna leh thawhrimna hmang chauhin a thleng thei tih a sawi a. Zirlaite chu an vanneih zia hria a, he coaching programme hi hmang tangkai a, an theihtawp chhuah turin a fuih.
MYC secretary V Lalmuanpuii chuan, Mizo thalai tam takin state pawn lama zirna atan sum leh mamawh dang an neih tawk loh avangin Central Civil Services-a an luh tumna an bansan fo thin nia sawiin, thalaitea investment siam chu investment tha ber a ni tih hrerengin, chief secretary leh LESDE department official-te kaihhruaina in he programme hi thalaite kawng hawnsak tura ruahman a ni tih a sawi.
Hawnnaah hian Drishti IAS atangin associate vice- president Georgi Mathan, chief content creator Neel Parmar, zirtirtu Vivek Kaushik te an lo tel a ni.
Free UPSC Coaching Programme kalkawng:
8 UPSC hnuaia Civil Services Examination-ah Mizo thalai an luh hnem lehzual theihna turin Mizoram sawrkar chuan Mizoram Youth Commission kaltlangin thla 12 chhung a thlawna UPSC Coaching kalpui tumin ruahmanna thar a siam.
8 Hemi atan hian India rama coaching institute hlun leh changtlung ber zing ami Drishti IAS New Delhi nen thawhdunna thuthlung an ziak a. Uluk taka screening process neih a nih hnuah UPSC aspirant 100 thlan chhuah niin, he coaching program hnuaia class hi kumin March 24 atang khan tan a ni.
8 He programme hnuaiah hian offline-in general studies class neih a ni a; optional subject 6 – political science & international relations, geography, sociology, anthropology, history leh public administration chu online-in zirtir a ni bawk. Hei bakah hian Aizawl pawn ami zirlaite tan hostel facility siam a ni.