US-China ten thawhhona chhunzawm ti

US leh China te chuan military-to-military communication chhunzawm leh remtiin hei hi ram pahnih inkar boruak sâng tihhniam zelna tura hmalakna a ni tiin US President Joe Biden chuana sawi.
“Inhawng leh inbiak pawhna chiang tak nei turin hma kan la leh a ni,” tiin China President Xi Jinping nena California-a inbiakna an neih hnuah a sawi a.
Hruaitu lawk pahnihte hi kum khat chuang hnuah hmaichhana an inhmuh lehna hmasa ber a ni bawk a.
Biden chuan ram pahnih hruaitu te chuan mimala inbiak pawhna kalpui an tum thu a sawi bawk.
Biden chuan inbiak pawhna neih tlem a nih chuan ‘accident a thleng thei thin’ tia sawi bawkin tunah chuan president pahnihte chuan ‘phone hmanga inbiak pawh nghal zung zung’ an tum tawh tiin a sawi bawk.
Nikum khan US House Speaker Nancy Pelosi-in Taiwan a tlawh hnuah China chuan nasa takin military-to-military communication a chhu chat a. Beijing chuan mahnia inrelbawl Taiwan chu a territory anga a ngaih niin a tul a nih chuan tharum hmang pawha chhuh mai tur a tih a ni.
Biden chuan Xi nen ngaihdan inang lo an la neih teuh thu a sawi a. Mahse, Xi chu a ‘langtlang’ tia sawiin an inbiakna chu ‘kan inbiakna neih tawha hlawk thlak leh tha ber’ tiin a sawi bawk.
A hmaa Xi dictator a lo tih tawh chungchangah Biden chuan, “Ram roreltu a ni a, dictator a nihna chu an sorkar kalphung leh kan sorkar kalphung a inang lo em a ni,” tiin a sawi thung a. June thlaa Biden-an Xi dictator a tih tum khan Chinese official te chu an thinrim hle a ‘awm ang lo’ tiin an lo sawi tawh a ni.
Military communication chhunzawm leh mai bakah ram pahnihte inkar tha lo an neih phahna thil hrang hrangah pawh inremna an siam bawk a.
Chung zingah chuan nunna tam tak chan phaha a awm tawhna US a fentanyl chawkluh tihtawp a nih theih nana hmalaknate pawh a tel a.
Chinese manufacturing company te chu he synthetic opioid siamtute an ni lo va, mahse a siamna atana pawimawh chemical siamtu te an ni thung. “Western hemisphere-a heng precursor chemicals thawn luh te tihnep a nih theih nan hma kan la dawn a ni,” tiin Biden chuan a sawi bawk.
Inremna siam ang chuan China chuan precursor chemicals siam tute chu a enfiah zui bik dawn a ni a. “Nunna tam tak chhanin a awm ang,” tiin Biden chuan a sawi.
Ram pahnih hruaitute chuan Israel leh Gaza buaina pawh an sawi dun a. Biden chuan China chu a thiltihtheihna hmanga Iran pawh nawr turin a ngen tia sawi a ni a.
Ram pahnih hruaitute chuan artificial intelligence (AI) enfiah remtihna an nei dun bawk a, Taiwan chungchang pawh rei tak an sawi dun niin US official te chuan an sawi bawk a. Taiwan chungchang hi Xi chuan ‘US-China inkarnaa issue lian leh hlauhawm ber’ a ti bawk.
China pawhin military pahnih te inbiakpawhna tha siam thar leh chu ‘inthluktlanna leh inzahtawnna’ hmanga siam tiin a sawi bawk a.
“Kan chenna lei hi ram pahnih te an hlawhtlin ve ve theih nana a lian tawh a. Ram pakhat hlawhtlinna chu ram pakhat tana hlawkna a ni thei a ni” tiin Xi chuan a sawi bawk a. “Innghirnghona chuan ram pahnih tan chhiatna nasa tak a thlen thei,” tiin a sawi bawk.
US leh China inlaichinna hi kumin February thlaa Chinese spy balloon US airspace a hmuha kahthlak a nih zui nghal khan a tichhe nasa zual hle a.
Juen thla khan US Secretary of State Antony Blinken chuan Beijing tlawhin kum tam tak chhunga Washington highest-ranking official Chinese capital tlawh leh hmasa ber niin President Xi leh foreign minister Qin Gang te a hmu a ni.