China-ah khawvela lei sang ber hawng
China-ah khawvela lei sang ber hawng
Khawvela lei sang ber chu lirthei zawh theih turin Pathianni khan China-ah hawn a ni ta tih an ram sorkarin a puang a, kum thum chhung a siam hna thawh a nih hnuah puitlin a ni ta tih an puang.
Huajiang Grand Canyon Bridge hi a hnuaia lui atangin metre 625-a sang niin an ram chhim lama Guizhou-ah, ram chhengchhia, kawr thuk takah kâna dawh a ni a. A hma pawhin he province-ah hian metre 565-a sang, Beipanjiang Bridge a lo awm tawh bawk a, hei pawh hi a sang ber dinhmun hauhtu ni thin mah se tunah chuan a dawttu a ni ta a ni.
Drone hmanga Pathiannia a thla an lak an tihchhuahah lirtheite chuan he lei thar an zawh lai leh an tlan kual lai a lang a, a chungah chhum dumpawl mawi tak a lang bawk.
A hawnna hunah hian mipui pawh an pungkhawm tha a, a dawh hna thawktu engineer leh tual chhung thuneitute pawh an tel a. Chanchinbu miten an kawmnaah an thil hawn chu an chhuangin an phur hle tih an sawi hlawm.
“Huajiang Grand Canyon Bridge hawn a nih takah hian lehlam lehlama inkalpawhna tura zin hun chhungin darkar hnih leh minute hnihin a titawi sawt dawn a ni,” tiin province transport department hotu, Zhang Yin-i chuan a lo sawi lawk tawh.
An ram bial chhunga inkalpawhna tihhmasawnna tha tak a ni a, an ram bial eibar leh khawsak phung pawh a chawi kân ngei a beiseiawm tih a sawi bawk.
China hian tun hnaiah kawngpui siamna kawngah hma a la nasa a, kawngpui bakah hmasawnna ruhrel lian tak tak dangah pawh tan a la hle a. Hei hian an ram eibar dinhmun a tihthan bakah an ram pawh a tichangkang chak hlea ngaih a ni.
Tlangram province, Guizhou hi lei sang tel awmna a ni a. Sorkar news agency Xinhua chuan Nilaini kal ta khan khawvela lei sang ber ber 100 zinga a zahve dawn chu an province-a awm a nih thu a lo puang tawh.
Huajiang Grand Canyon Bridge dawh zo tur hian kum thum chuang hret hun hman a ni tih Xinhua chuan a tar lang a. Metre 1,420-a thui niin ‘khawvela tlangrama lei dawh sei ber’ nihna a hauh nghal bawk.
Khawvela sang ber a nih rual hian lei (ground) atanga a hlat zawngah chuan France-a Millau viaduct chu metre 343 niin a ber nihna a la hauh.