US chuan Chinese ballon America hmun hrang hranga military hmunpuite enthlatu anga a ngaih chu a kap thla.
Department of Defence chuan an fighter jets ten US territorial water ah balloon hi an kap thla tiin an sawi a.
China foreign ministry chuan US sipai tena tharum hmanga civilian unmanned aircraft an kap thla chu a lawm loh thu a sawi nghal thung.
-- Advertisement --
China ballon hi F-22 jet fighter chuan missile AIM-9X Sidewinder hmangin US coast atanga 6 nautical miles a hlaa a awm laiin a kap thla a ni.
Defence official te chuan balloon kehthem hi tui 47ft vela thukah Myrtle Beach, South Carolina-ah a tla an ti bawk a.
Sipai te chuan balloon kehthem 11 km vel laia thuia tladarh chu chharkhawm hna an thawk zui mek a. Naval ship pahnih hmangin hma an la zui a ni.
Pentagon chuan thuchhuah siamin ‘PRC (China) surveillance balloon lakah kan him theih nan thil tul leh pawimawh kan ti vek a, US territory a thlawk ut surveillance balloon hi kan tan a pawimawh a ni’ tiin a sawi a.
“Kan zirchiangin kan enfiah thei ang a, eng khawlte nge a ken tih te kan hrefiah thei dawn a ni” tiin official chuan a tarlang bawk.
US President Joe Biden chu balloon kar kalta Ningani a hmuh a nih hnu atangin kapthla tura nawrna nasa tak tawng nghal a ni a. Balloon kahthlak a nih hnuah Biden chuan, “Hlawhtling takin an kapthla thei a, kan aviator a titute ka fak a ni,” tiin a sawi.
Balloon kahthlak a nih hnu lawkah Chinese foreign ministry chuan thuchhuah siamin, “China chuan US hnenah he airship hi civilian thila hman a ni a, US-ah hian duh reng vang ni lovin tihpalh thila lut a ni tih kan hrilh nawn awn awn a ni,” tiin a sawi thung.
He balloon hian diplomatic crisis thlen nghalin US Secretary of State Antony Blinken an China tlawh a tum chu a thulh nghal hmak bawk a. Chinese thuneitute thung chuan spying aircraft a ni lo tia sawi thungin weather warship kal peng palh tiin an sawi ve thung.
Hetih lai hian Taiwan foreign ministry chuan thuchhuah siamin, “Chinese Communist Party sorkar chetlak dan hian international law a bawhchhiaa ram dang te airspace leh sovereignty namnulin ngaihzam tur chi a ni lo,” an ti a.
China hian Taiwan hi a lak atanga inla hrang mai mai, engtikah emaw Beijing thuhnuaia la awm tura a ngaih tlat niin President Xi Jinping phei chuan Taiwan lak nan a tul chuan tharum hman an hreh dawn loh thu a sawi hial tawh bawk.
Taiwan erawhin mahni inrelbawl ram angah inngaiin constitution hran a nei a, democratic takin an aiawh an tlang thin bawk.
US President Biden chan balloon kahthlak hi Nialini kalt khan remtihna a pe tawh a, mahse, Pentagon lam chuan lei lama cheng te tana a hlauhawm loh nan tuipui chunga a awm hun an changin an nghak thung a ni.
Kah thlak a nih hmain US Federal Aviation Administration (FAA te chuan airport pathum a civilian thlawhna te chu an thlawhtir rih lo vek hial a ni.
He China balloon hian 28 January khan US ram chin a thlawk lut a, Aleutian Islands hnaiah thlawkin chu mi hnu ni thumah Canadian airspace a lut leh a, 31 January khan US ram chin a lut leh a ni. Balloon hi US state Montana-ah hmuh niin helai hmun hi nuclear missile site pawimawh tak tak dahkhawmna a ni bawk.
China-in satellite aiah enga tinge Balloon a hman?
China chuan Montana chung zawna balloon chu ‘civilian airship’ tia sawiin a kawng atanga peng sual a ti a, US erawhin ‘high-altitude surveillance’ device a ti thung.
Eng pawh nise US chuan a ngai thutak takzet a, Secretary of State Antony Blinken an China 5&6 February a tlawh a tum a thulh phah thak bawk.
Balloons te hi surveillance technology upa ber te zinga tel niin Japanese military te khan World War II lai khan US beih nan an hman thin a ni a. Cold War lai khan US leh Soviet Union ten an hmang nasa bawk.
“Beijing hian Washington hnenah inzawmna tha neih kan duh a, chutih rual chuan inelna kan neiha kan chungnun zawk theih nan hmanrua eng pawh hman kan inhuam an tihna tluk a ni” tiin independent air-power analyst He Yuan Ming chuan a sawi.
China balloon te an hmuhna hmun hi US in missile pawimawh a dahna hmun a ni kher bawk hian tihpalh thila balloon te hi an kawng ata peng bo anga ngaihna chu a awihawm loh nghal bawk.
Mahse China expert Benjamin Ho chuan Beijing chuan surveillance technology tha nasa zawk a nei reng a ti a. “American infrastructure te spy tur hian leh information an duh nei thei turin hmanrua an nei. Balloon an tirhna chhan hi chu Americans te signal an pekna niin engtiangin nge America in a ngaih tih an hriat duhna zawk a ni,” tiin a sawi thung a. China hian balloon chu US-in hmu ngei se an duhna zawk a ti bawk.