US-in Haqqani-a luman an hlip – Taliban sorkar
US-in Haqqani-a luman an hlip – Taliban sorkar
Afghan Ministry of Interior Affairs thupuangtu chuan US-in Taliban hruaitu lian, Sirajuddin Haqqani-a man theih nana a chin hrilh thei hnena $ maktaduai 10 pek a tiam chu a hlip tih a puang.
Afghan sorkarin hetiang hian Inrinni khan puang mah se FBI-in an website-a luman nei an tan lan zingah chuan a la tel reng a. Haqqani-a hi ‘United States leh Afghanistan-a an thawhpuite beihnaa inhnamhnawih leh tel ve’ nia an hriat thu an tar lang a ni.
Taliban hian Ningani khan kum hnih an hren hnuah US khua leh tui an chhuah a, hemi hnu lawkah Haqqani-a luman hlihna hi puan zui a ni.
George Glezmann-a hi Devember, 2022-a Afghanistan-a a zin man niin January hnua Taliban-in US an hren an chhuah pathumna a ni.
US Secretary of State Marco Rubio-a’n thuchhuah a siamah Glezmann-a chhuah a nih chu ‘thil tha leh kawng dik zawhna’ a nih thu a sawi a. Chhuah tura Qatar-in a puihnaah lawm thu a sawi bawk.
Taliban chuan US mi an man an chhuahte hi ram dang nena ‘pangngai taka inkungkaihna’ an neih theih nana an tih a nih thu a puang.
August, 2021-a Afghanistan-a thuneihna an chan leh hnuah ram eng emaw zat chuan palai tirin inthlunzawm pui mah se eng ram mahin sorkar pangngaiah an la ngai lo.
Taliban-in Afghanistan an thunun leh hi US president hlui, Joe Biden-a sorkar khan a hma chiaha President Donald Trump-a thiltih a chhawm zinga mi a ni.
Trump-a khan a sorkar hmasak tawp dawn, kum 2020 khan Taliban nena Afghanistan-a indona titawpin thla 14 chhungin US sipai leh an thawhpui sipaite chhuak turin a ti.
An chhuah rual hian khawthlang ramte puia ding Afghan sorkar chu Taliban hian paih thlain thuneihna an chang zui a ni.
Haqqani-a hi Soviet-ho an beih laia an commander hriat hlawh tak fapa niin tunah hian US-in firfiak pawla a chhal, Haqqani Network enkawltu a ni.
Thihchilhna thlentu leh Kabul-a kum eng emaw zat chhung beihna lian tak tak thlentu nia hriat a ni.
An pawl hi Afghan thuneitu sang tam tak thattu leh tlanchhuahna thil phuta khawthlang mite ru botu nia hriat an ni a. AN rul zingah hian US sipai, kum 2014-a an chhuah, Bowe Bergdahl pawh a tel.
Taliban-ten Afghanistan an thunun leh hnuah pawh US hian Haqqani-a hi an en zui reng a. Kum 2022-a drone hmanga Kabul-a khatih laia al-Qaeda hruaitu, Ayman al-Zawahiri-a an thahna in pawh kha a in niin US thuneitute chuan an sawi.