US-in min kah loh chuan keini pawh kan che lo vang – Iran

Iran chuan US-in a beih hmasak loh chuan anni pawhin kut an thawh dawn bik lo tih Iranian thuneitu sangin Pathianni khan a sawi a. President Donald Trump-a hian chawlhkar hnih chhung beihpui a thlak chu a chawlhsan leh tawh a ni.
US hian zan 13 a zawna Iran an beih hnuah Zirtawpni zan tlai tawh takah khan an tawpsan tih Pentagon chuan a sawi a, Inrinni leh Pathianni khan engtin mah kut an thlak zui tawh rih lo.
Iran hian US-in a beih apiangin a chhan let nan an thenawm hnaia US awmhmunte chu a bei ve nghal zel a, Washington-in chet a bânsan hnuah anni pawhin ni hnih chhung engmah an ti lo tawh.
UN-a US palai, Mike Waltz-a chuan Pathianni khan Fox News hnenah inbe tura hun thawl a awm theihna turin Trump-a’n sipai chakna hman tawpsan turin thu a titlu tih a sawi.
“Hun thawl a pe a, inngaihtuahna hun tlem a siamsak a ni,” tiin a sawi a, a bak engmah a sawi lo.
CNN, New York Times leh Axios telin US chanchinbute chuan Trump-a hian a sipai hotu lawk leh vantlang a thawhpuiten sipai chakna hman tawpsan tura an rawn angin a tawpsan a, Israel nena February atanga beihpui thlakna lian an kalpui ang kha tha an ti lo niin an tar lang hlawm.
Iranian hotu lian pakhat, a hming tar lan duh loh chuan Reuters hnenah, “Iran tanchan chu a la ngai reng a, ‘min tih chuan tihlet ve’ tih a ni mai a. Min kah an tawp chuan keini pawhin beihpui kan thlak kan tawp ang. Hei hi a hma atang tawha US laka kan kalpui a ni,” a ti.
Sipai chakna hman an tawpsan chungchangah Trump-a sorkara mi pawimawh pakhat chuan Inrinni khan president hian ‘indawrna chu a duh ber a ni a; mahse, Iran hnenah hian dawhkan kila thil tak tak sawiho tura an hlawhchham chuan eng nge thleng tur a hriattir a ni’ tih a sawi.
Chawlhkar hnih liam ta chhungin US sipaite chuan zantin Iran kapin Washington chuan Iranian-ten Strait of Hormuz-a lawng an beih vang niin a sawi a. Iran chuan khawvel puma tuialhthei phurh hmun ngaa thena hmun nga kalna strait hi thunun an tum vangah a puh.
US-in sipai chakna a hmang leh hi thla hmasaa indo titawp tura inremna lailawk an siam hnu lawkah a ni.
US sipaite hian Iran chhim lama lei leh leiverhte pawh an kap chhe hman a, a chhan let nan Iran chuan an thenawma Gulf Arab ramten chenna atana an thlaler hmun an siam theihna pakhat, tui an tihthianghlimna hmun a kap ve bawk.
Kar liam ta khan Iran-in Yemen-a an thawhpui, Houthi chuan Red Sea-a Saudi tuialhthei a dang bawk a, hei hian energy phurh vel a tibuaithlak zual hle bawk.