Uzbek president-in Asia lailia ramte tan pawl din rawt

Uzbek president-in Asia lailia
ramte tan pawl din rawt
Uzbek President Shavkat Mirziyoyev-a chuan Asia lailia awm ramten thawhhona tur pawl, ‘Community of Central Asia’ tiin din ni se tia rawtna a sawi chhuak a, hei hi heng lai rama mihring maktaduai 80 chuang chengte eibara an inchawi kan tawnna atana tul niin a sawi.
Tashkent-a Soviet Union kehdarh ta atanga Asia lailia ram hrang ding ta panga hruaitute nen an inkawmnaah Pathianni khan a sawi chhuak a. He inkawmnaah hian Azerbaijan pawh telin Mirziyoyev-a chuan ram panga hruaituten tih thana neia an inkawmna thin chu tangrual ramah chantir ni se tiin a rawt a ni.
Ram an tan rual chuan eibarah an hlawkpui theih dawn piah lamah venhimna leh khuarel thila thawhhona an siam thei dawn bawk niin a sawi a ni.
Asia lailia awm ramte hi leilung hausakna leh energy-a hausa tak ram ni hlawmin eibar leh politic thila Russia nena inhnimhnai reng thin an ni a; mahse, tun hnaiah an hawi lam thlakin khawthlang ramte an kawmngeih thar a. An thenawm hnai dang, China pawh sumdawnna thilah hian an kawmngeih viau hlawm bawk.
Uzbek president-in rawtna a neih hi ram dangten eng angin nge an ngaih tih erawh tunah rih chuan a la hriat lo va; mahse, heng ram pangate hian tun hnaiah inpumkhata inhlawm ngheh lehzual an duh thu an sawi theuh hlawm thung.
Hetih lai hian an zinga pahnih, Kyrgyzstan leh Tajikistan hi kumin kum tirah khan rei tak atanga an buai tawhna, ramri-ah intibuai thar lehin mi za telin nunna an chân phah nghe nghe.
Ram panga hruatute hian tun thla tirah khan Washington an tlawh vek a, US President Donald Trump-a an kawm hlawm a ni.
Hetih lai hian Mirziyoyev-a chuan an zingah Muslim South Caucasus tamna, Azerbaijan chu tel ve tha a tih thu a sawi bawk a, anni hi Asia laili rama chhiar tel an ni ngai lo va, an intawh khawmnaah hian tel ve ziah thin tawh se tiin Uzbek president hian a rawt a ni.