United player lak tum langsar pa 5

Mirror Football in a tarlan danin Premier League club lian Manchester United chuan neitu thar a nei dawn hnai a. Saudi Arabia pa hausa Sheikh Jassim chu United neitu thar ni tura ngaih a ni. Sheikh Jassim hian United a rochun a nih chuan player hrawl lak tumin hma a la nghal dawn a, United in lak an tum langsar zual panga kan tarlang ang.
Harry Kane
Manchester United hian EPL leh Champions League-ah champion beisei thei turin world class striker an mamawh a, stiker thar lak luh an duh ber chu England captain Harry Kane a ni.
Kane hi Manchester United mamawh chhanna ni thei tur a ngaih a ni a, amah ngei pawh hian Tottenham chhuahsanin United pan a hreh lo viau nia hriat a ni. United in lak duh in, amah ngei pawhin Old Trafford pan duh bawk mah se Tottenham hian an club tana goal thun hnem ber hi Premier League-a an elpui lakah hralh chu thih hreh takin an hreh a. An chelh thei ngang lo a nih pawhin ram dang club hnenah hralh an duh. Kane hi German champion Bayern Munich in lak an tum ve reng a. Football club hausa leh hlawhtling ber Real Madrid pawhin Karim Benzema hmunruak luahtu atan lak luh an duh ve bawk.
United hian club neitu thar ni ngei tura ngaih Sheikh Jassim hnuaiah bazarna tura an mamawh sum an nei ngei dawn a, Kane lak nan sum hlawm lian sen an hreh dawn lo. Sum nei bawk mah se Kane hi an la thei kher ang em tih a chiang lo thung. United hian Kane an lak theih loh tak palha an buai lutuk loh nan Victor Osimhen, Goncalo Ramos, Mohammed Kudus, Randal Kolo Muani leh Rasmus Hojlund te an thlithlai tel reng a. Heng zawng zawng aia an duh ber chu Kane hi a ni reng thung.
Neymar
Footballer manto ber Neymar hian Paris St-Germain-ah lawm a hlawh zo tawh lo. PSG thuneitu leh an club sopporter ten chhuak se pawi an ti lova, amah ngei pawh hian PSG chhuahsan a hreh lo viau bawk. PSG chhuahsan a duh thu a rik rualin Manchester United hian an tan lak theih tur chi a ni em tih an thlithlai zui nghal. Brazil forward Neymar hian United zawm a hreh lova, United in neitu thar an neih hunah Neymar lak tumin thapui an thawh zui tura ngaih a ni.
Moises Caicedo
Forward langsar pahnih Harry Kane leh Neymar te an la thei a nih pawhin United hian an mahni chawmtu tha an mamawh belh ngei dawn. Brazil midfielder Casemiro nei bawk mah se manager Erik ten Hag chuan midfielder pahnih Scott McTominay leh Fred te hralh a tum. Midfielder pahnihte hi an hralh a nih chuan midfielder thar an mamawh ngei dawn a, lak luh tura an beisei langsar tak chu Brighton midfielder Moises Caicedo a ni.
Moises Caicedo hi club lian dang Chelsea, Liverpool leh Arsenal te pawhin an ngaihven niin tarlan a ni a, United tan pawh awlsam taka lak theih tur niin a lang lo.
Diogo Costa
United si nghak David de Gea hma lam hun a chiang lo mek a, contract thar chungchangah inremna an la nei thei lo. De Gea hi a cham chhunzawm dawn a nih pawhin si nghak duh thlan a ni zui kher ang tih an tiam thei bik lo. Hei vang hian si nghak thar lak luh tumin ruahmanna an siam a, Porto si nghak Diogo Costa, Inter Milan si nghak Andre Onana leh Brentford si nghak David Raya te an buk tawn vel mek.
Kum 23 mi Portugal international hi Porto chuan €75m (£64.2m) an chhiar a, United hian €60m (£51.3m) velin lak fel theih an inbeisei thung a, si nghak an thlithlai mek zingah ani hi an tana tha ber tura ngaih a ni.
Jurrien Timber
United manager Ten Hag chuan an tlarhnung thuam chak turin defender thar lak luh a duh a, a club hlui Ajax lama a lo hriat chian tawh Timber lak a duh. Kum 21 mi Timber hi position dangah pawh a khel thei a, Ten Hag hian Old Trafford-ah hruai luh a duh hle.
A tir lama kan tarlan tawh angin United lei tuma dawrtu zingah Sheikh Jassim hi thlan a ni dawn niin tarlan a ni a. Official-a club neitu thar a nih tur thu puan chian la ni lo mah se lawmpuina hlan tawk an awm nawk tawh. Rinlawk anga United a lei thei a nih chuan he club ropui hi an ropuina nei let leh turin an thuam chak thar hle ngei dawn a, City lehpelh tumin thapui an thawh ang.