Val Upa Council-in hma la

MLA-te uchuak takin an inhaivur nia hriat avanga endik tura PC party-in an ngen angin ZPM party-a Val Upa Council chuan an bawhzui tih an sawi.
PC party hian kumin May 6-a Val Upa Council (VUC) hnenah hian ziaka thlenin, MLA-te hamthatna uchuak insiam leh speaker motor thar lei chungchangah hma la turin a ngen a. June 24 thleng khan chhanna an la dawng lo tiin, PC president Vanlalruata chuan The Aizawl Post zawhna a lo chhang tawh a ni.
June 25 khan ZPM VUC secretary Prof Thangchungnunga PC president hnenah hian ziaka thlenin, June 6-a VUC thutkhawmah an thu rawn thlen hi ngaihtuah a ni a. An theih leh thiam ang angin an bawhzui tih a sawi.
‘Sawrkar thuneitute kawmin, an insawifiahna te ngun takin kan ngaihtuah a; chutiang chuan VUC-in tul a tih angin hma lak tawh a ni,’ a ti.
PC party-in VUC hnena a lehkha thehluhah hian, ZPM sawrkarin inrenchem a sawi reng laiin uchuak taka invulhin, simple interest-a kum khata zaa 5.5 leka pung turin MLA 40-in mipui sum atangin kuminah cheng nuai 1050 puk an tum tih a thlen a. ‘Hetiang em em hian MLA term kal tawha MLA-te an la invulh ngai loa, mipui min zah loh dan hi a uchhuak a ni,’ a ti. ZPM chuan an kalsual veng turin VUC an nei tih MLA inthlan campaign laia an sawi angin, an kalsualna chu VUC hnenah an thlen tih a sawi a ni.