Vankal Solar Park 20MW

Nizung chakna hmanga kawlphetha MW 20 pe chhuak thei Vankal Solar park, cheng nuai 2107 senna chu hawn a lo ni ta a. Renewable energy siamchhuahna kawnga Mizoram hmasawnna mellung pawimawh tak a ni kan ti thei awm e.
Petromax chungchanga fiamthu nena chawhpawlh hlawh tak Vankal khua hi khaw mawngping ve tak a ni thin a, a awmnain a zir avanga indopui pahnihna pawh hre lo ang hiala fiamthua sawi hlawh thin a ni nghe nghe. Petromax an nei thar ve a, an chhi thiam lo a, an thenawm khua Kawlkulh atangin chhit en sain an khai haw a, a off dan hriat loh avangin Kawlkulh lamah an khai let leh, tia fiam hlawh tak Vankal khua chu, Mizorama renewable energy pekchhuahna hmunpui ber a lo ni ta der mai.
Vankal Solar Park atan hian state sawrkar sum cheng nuai 1707 leh sawrkar laipui Ministry of New & Renewable Energy (MNRE) sum cheng nuai 400 hmanral a ni a. Kum 2018 August thlaah bultan a ni a, mahse a hnu lamah hripui leng avangin zawh hun tura ruahmanah zawh hman a ni ta lo a ni.
Power siam chhuah kawnga pachhe ve tak Mizoram ang tan hi chuan, tuna renewable enegry ang hi kan bawh nat zawk a pawimawh dawn niin a lang. Hydel project te hi a tha em em, mahse a senso a hautak chu thuhran, ram leilung zau tak tihchhiatna a ken tel tlat avangin, keini ram zimte tan hi chuan, kum 200/300 lo la awm tur thlirlawk rana tun atanga hmasawnna rahbi rah dan kan thiam a pawimawh dawn hle niin a lang.
Serlui B hydel project hi MW12 (4X3) pe chhuak thei tura duan ni mah se, khawl pakhat hman theih loh avangin tunah hian 8MW bak a pe chhuak thei lo nia sawi a ni. Serlui B Hydel Project hi kum tam tak chhung buaipui a nih piah lamah, senso pawh cheng vaibelchhe za tam senralna a ni a. Ram zau tak a khuhbo bakah energy a pekchhuah tur ang pawh pe chhuak thei lovin a la awm zui bawk.
Tuna Vankal Solar Park leh Serlui B hydel hi han khaikhin chhin ta ila. A senso thuah Serlui B hydel project hi Vankal Solar park senso let 40 aia tam a ni a, chutih laiin energy a pek chhuah theih zat chu Vankal SP-in 20 MW a pekchhuah theih laiin Serlui B HP chuan 8MW chauh. Ram a tihchhiat zau zawngah pawh, Vankal SP let za tam Serlui B HP hian ram a tichhia a ni.
A din chhung rei lo, a senso hautak lo zawk, energy a pekchhuah theih tam zawk bawk si, hetiang renewable energy siamchhuah lam hi Mizoram hian kan bawh chak a pawimawh dawn hle a ni.