Vantawng khawh thla chhehvelah hmanhmawh takin CM hoin ram lei – Congress Thalai

Vantawng khawhthla thlirna hmun leh a chhehvel Kanghmun South ram huamchhungah chief minister Lalduhoma’n kum 2024 khan man to takin ram a lei niin Congress Thalai chuan an sawi.
Congress Thalai Hqrs. thuchhuak chuan, Inrinni khan helai hmun hi an tlawh a. Vantawng khawhthla thlirna chhehvel, Buangpui ramah buh tin 25-30 hmun vela zau, mi panga ram chu chief minister a nih hlim chhawnah a tahtawl (plot) te tein Pu Lalduhoma hian a lei nia sawiin, Kanghmun South lamah pawh mi 4 ta leiin,a then phei chu February thla tawp lama vah chauh a ni a, kar hnih pawh chapchar a nih hmain hal a ni a, he ram hi sawrkar department pakhat enkawl tir tura ruahman nia sawi chu a hmunah an finfiah tih a sawi a ni.
Heng ram hi Vantawng ram leh Saphak lui chhak lam, Vantawng khawhthla thlirna remchang hmun tha lai zawng zawng chu chief minister hian SASCI Scheme (Development of Iconic Tourist Centres to Global Scale) hmanga Vantawng khawhthla (Thenzawl) bula rope-way siamna tura cheng vaibelchhe 34.50 hmanga hmalakna kalpui tur compensation a dawn theihna hisap chung leh, Thenzawl Peace City-in a huam tur Kanghmun South rama mahni mimal inhaivura hmalakna a ni tih a sawi.
‘Vantawng khawhthla leh a chhehvel hi heng lai ram neitu khua hian Forest department enkawlah ngaiin an pa pek reng thin a, tunhnai kum hnih velah khan mak tak maiin, Lengpui Airport sir ram hralh tura hmanhmawh taka file kalpui a nih angin party pakhat ruahmannain mi thenkhatin anmahni pualin hmanhmawh takin an insem a, an ram inpek /sem chu chief minister Pu Lalduhoma hian hmanhmawh takin a leikhawm sak ve thung a, a ram lei chin pawh hungtir niin hung zawh a la ni lo. Chulai ram leh a chhehvel chu hmun pawimawh tak a la nih dawn avangin hmanhmawh takin a panna kawng pawh zauh a ni a, ramngaw nuam leh Fâr thing din thupna hmun chu kih rem an ni vek tawh a hmunah finfiah a ni,’ Congress Thalai thuchhuah hian a ti.
Term khat pawh la hmang lo chief minister Pu Lalduhoma’n Chawlhhmunah cheng vaibelchhe 15 man in sa in, Tlawng lui himna atana tha lo leh Tlawng lui kama miretheite ‘nul’ siama eizawngte tawrh theihna turin leivung paih hmanga sumdawng zuiin leivung danna check-dam emaw retaining wall pawh siam loin River Forest Reserve huamchhungah forest activity ni lo, spoil bank (non-forest activity) tih phalna clearance document nei miah lo nia an sawi khan Inter Bus Terminal hmunpui tura duan nia sawia thlam ropui sa tel chungin, Vantawng khawhthla leh Kanghmun South rama ram zau tak, cheng nuai tam tak senga a lei thei leh hma a la tel lehzel chuan, kum 2021 Serchhip by election-a rethei leh sum nei loa insawi tan eirukna liantham tak a awm ni ah an ngai a. Chief minister ni rei lo ber ni chungin chief minister ni tawh zinga hausa chak berah an ngai tih a sawi a ni.