Vantlang ram humhalhna dan siamthatna tur – “The Mizoram (Restriction on use of Transferred Lands) (Amendment) Bill 2023” chu Assembly House-ah pawm a ni.
-- Advertisement --
Ningania Mizoram Legislative Assembly Session neihah Land Revenue & Settlement minister Lalruatkima chuan he Bill hi House pawmpui turin a pulut a. Kum 1890 cho vel atanga Aizawl khawpui chhunga Assam Rifles ten an ram luah an chhuahsan huna enkawl zui zel dan tur chungchang a ni.
Aizawl khawpui lailia Assam Rifles chhuahsan tur ram chu vantlang tana hman tur chauha humhalh a, mimalin an neih theih lohna dan chu kum 2002-a State Assembly-in a lo pawm tawh a ni tih Revenue minister hian a sawi.
Dan siamthat rawtnaa, Section 4-naah chuan sawrkar kuta helai hmun a awm velah, mimal ram nei an awm a nih chuan collector hnenah an hlan nghal tur a ni a, an dah nghal lo a nih chuan dan lo anga ram luah anga ngaih an ni ang, tiin, collector-ten ram an lak turah hian tibuaitu an awm a nih chuan, tharum hial pawh an hman theih thu a inziak.
Section 5-naah Assam Rifles ram chhuahsan chu sawrkarin mipui tan chauh a hmang tur a ni, tiin a inziak a. Section 7-naah section 4/5-na bawhchhia an awm a nih chuan Rs. 5000 chawi theih a nih bakah an bawhchhiat chhunzawm zel chuan nitin Rs.500 a tih pun a nih tur thute minister hian a sawifiah.
Sawihonaah member hrang hrangin dan siamthat an thlawp thu an sawi a. Siamthat ngai lai leh rawtna thar te sawiin, lungrual takin House hian a pawm zui a ni.